ඉඳුනිල් කහටපිටිය –
මේ ක්රිකට් කෙළිය අපට කළ හැක්කක් නොවේ. එක්කෝ මුං හැදෙන්නට ඕනෑය. නැතිනම් අද දිනයි, හෙට දිනයි කියා හිතමින් ක්රිකට් බලන අපේ විලිලජ්ජා නැතිකම නවත්වා ගන්නට ඕනෑය. දෙකම වෙන්නේ නැත. මේ ක්රිකට් හැදෙන්නේත් නැත. අප තේරුම් ගන්නට අවශ්ය මේ මුන්ට පුලුවන් හරිය බවය.
එංගලන්තයට එරෙහි දෙවැනි විස්සයි විස්ස තරගයත් පරාදය. විස්සයි විස්ස තරගාවලියත් පරාදය. අපට තවම ලෝක කුසලානයට ක්රීඩා කරන සංචිතය සම්බන්ධව අදහසක් නැත. මේ සිදුවන්නේ අහවල් දෙයක් දැයි අපට තේරෙන්නේ නැති බවත් කිව යුතුය. මේ සටහන තබන්නේත් ඒ කල්පනාවෙන්මය.
ලංකාවේ නොම්බර 1 දඟ පන්දු යවන්නා වූ ද ලෝකයේත් හොඳම වැඩ්ඩෙක් යැයි අදහස් කරන්නා වූ ද වනිඳු හසරංග හොඳටම ගුටි කද්දි අප අඩීල් රෂීඩ් ඉදිරියේ ඇඹරෙන්නේය. විල් ජැක්ස් ඉදිරියේ දෙකට නැමෙන්නේය. ලියම් ඩෝසන් ඉදිරියේ අන්ද මන්ද වන්නේය. අපේ රටේ අපේ දඟ පන්දු යවන්නට හැදූ තණ තීරුවල අපේ දඟ පන්දු යවන්නන්ට පතුරු යන්න වදින විට උන්ගේ දඟ පන්දු යැවීම අපව අඹරා පසෙක තබන්නේය. දැන් අහන්නට සිදුවන්නේ මේ කුණුහරපය කුමක්ද කියාය.
පුද්ගලිකව එන පීඩනය තඹයකට නොතකා රට දිනවූ නායකත්වය –
පල්ලෙකැලේ දෙවැනි තරගයත් කඩුළු 06කින් පරාදය. එංගලන්තය මේ ගැහිල්ල ගහන්නේ කණ්ඩායමට මෙන්ම කණ්ඩායමේ නායකත්වයට ද බරපතල පීඩනයන් එල්ල වෙමින් ඇති පසුබිමකය.
එංගලන්ත නායක හැරී බෲක් හා සම්බන්ධ මතභේදාත්මක පුවත් පැතිරෙමින් තිබිණි. පසුගිය වසරේ නවසීලන්තයේ වෙලින්ටන් නුවර රාත්රී සමාජශාලාවකදී ඇති වූ සිද්ධියක් සම්බන්ධයෙන් හැරී බෲක් සිදුකළ අසත්ය ප්රකාශයක් හෙළිවීමත් සමඟ ඔහු දැඩි පීඩනයකට ලක්ව සිටියේය. එම අවස්ථාවේදී තමා තනිව සිටි බව බෲක් පැවසුවද, ඔහු සමඟ ජේකබ් බෙතල් සහ ජොෂ් ටන්ග් යන ක්රීඩකයින් ද සිට ඇති බව දැන් තහවුරු වීමත් සමග ක්රිකට් නියාමන ආයතනය (Cricket Regulator) මොවුන් තිදෙනා සම්බන්ධයෙන් පරීක්ෂණයක් ආරම්භ කර ඇත්තේය. බෲක්ගේ නායකත්වය පිළිබඳව ද විවිධ විවේචන එල්ල වෙමින් තිබිණි.
ඒත් අදත් ඔහු සිය ඩියුටි එක හරියටම කළේය.
පල්ලේකැලේ පැවති තරගයේ දී කාසියේ වාසිය දිනාගත් එංගලන්ත නායකයා ප්රථමයෙන් පන්දු රැකීමට තීරණය කළේය. ශ්රී ලංකා කණ්ඩායම අද තරග වැදුනේ වෙනස්කම් දෙකක් සමගය. අංක 04 පිතිකරු ලෙස ධනංජය ද සිල්වා වෙනුවට පවන් රත්නායක කැඳවා තිබිණි. පසුගිය තරගයේ දී මෙලෝ රහක් නැති තාලවර්ගයේ ගසක් සේ සිටි මහීෂ් තීක්ෂණ වෙනුවට දුනිත් වෙල්ලාලගේට අවස්ථාව ලැබ තිබිණි.
පවන් තමන් අංක 04 ස්ථානයට උචිත පිතිකරුවා බව අද තමන්ට ලැබුණු මුල් අවස්ථාවේදීම තහවුරු කළේය. මේ තරගයේ ශ්රී ලංකාව පැත්තෙන් දුටු එකම ධනාත්මක තහවුරුව එය ය. පවන් පන්දු 22ක දී ලකුණු 40ක් ලැබුවේය. පැතුම් නිශ්ශංක පන්දු 22ක දී ලකුණු 34ක්, කමිල් මිෂාර පන්දු 30ක දී ලකුණු 36ක්, කුසල් මෙන්ඩිස් පන්දු 17ක දී ලකුණු 32ක් ලැබුවේය. චරිත් අසලංක පන්දු 22ක දී ලකුණු 28ක් ලැබුවේය. එහෙත් කිසිවෙක් අර්ධ ශතකයක් ඉක්මවා ගිය ස්ථාවර ඉනිමක් ක්රීඩා කළේ නැත. කෙසේ වෙතත් පන්දු ඕවර 20 තුළ ලකුණු 189ක් ලබා දීමට ශ්රී ලංකා කණ්ඩායමට හැකි විය.
පන්දු යැවීමේ දී ජොෆ්රා ආචර් ලකුණු 42ට කඩුළු 02ක්, විල් ජැක් ලකුණු 24ට කඩුල්ලක්, අදීල් රෂීඩ් ලකුණු 25ට කඩුල්ලක්, ලියම් ඩෝසන් ලකුණු 32ට කඩුල්ලක් ලැබුවේය.
20යි විස්ස වෙනම තලයක –
එහෙත් මේ වනවිට විස්සයි 20 ක්රීඩාව පවතින්නේ වෙනම තලයකය. නවසීලන්ත ඉන්දියා තරගාවලිය යන්තමින් හෝ බැලුවා නම් ලකුණු 225ක ඉලක්කයක් වුවද මේ තරගයක් ජයග්රහණය කිරීමට ප්රමාණවත් නැති බව පෙනෙන්නේය. තරගවල ප්රකට වන්නේ “පවර් හිටින්” ආශ්චර්යයන්ය. අවස්ථා දෙකක දෙසීය ඉක්මවා යන ඉලක්ක ඉන්දියානු කණ්ඩායම හඹා ගියේ පන්දු ඕවර 16ක් ගෙවෙන්නටත් පෙරය.
පවර් හිටින් ගැන විශේෂ උත්කර්ෂ නැති අප අමාරුවෙන් රැස් කරන ලකුණු ප්රමාණ රැක ගන්නට තරම් විශ්වාසනීය පන්දු යැවීමක් මේ වනවිට කණ්ඩායම තුළ නැත. දඟ පන්දු යවන්නෙකුගේ මන්දගාමී පන්දුවක් හතරේ සීමාවෙන් එළියට යොමු කරගන්නට හැකි පිතිකරුවන් අපට හිඟ බව මේ තරග දෙකේදීමත් එක්දින තරගාවලියේදීත් පෙනුණේය.
අතර මග ඇද හැලුන වර්ෂාව හේතුවෙන් තරගය කෙටි විය. පන්දු ඕවර 17ක් තුළ ලකුණු 168ක ඉලක්කයක් එංගලන්තයට ලැබිණි. එංගලන්තය එම ඉලක්කය පන්දු 2ක් ඉතිරිව තිබෙද්දී ලබා ගත්තේය.
අප දුටුවේ එංගලන්ත කණ්ඩායමේ අඛණ්ඩ ප්රහාරාත්මක පිතිකරණ රටාවය. ජොස් බට්ලර් පන්දු 29ක දී ලකුණු 39කි. ටොම් බෙන්ටන් පන්දු 33ක දී නොදැවී ලකුණු 54කි. බරපතල ප්රශ්න රැසකට මුහුණ දී සිටි නායක හැරී බෲක් ඒ ප්රශ්නවලට පිත්තෙන් උත්තර දුන්නේය. ඔහු පන්දු 12ක දී ලකුණු 36කි. සෑම් කරන් පන්දු 13ක දී නොදැවී 20කි.
වනිඳු හසරංග පන්දු ඕවර 4 තුළ ලකුණු 44ක් ලබා දුන්නේය. කඩුළු ලැබුවේ නැත. එෂාන් මාලිංග පන්දු ඕවරයයි පන්දු 2ක් යවා ආබාධයකට ලක් වීමෙන් පිටියෙන් ඉවත් විය. මතීෂ පතිරණ පන්දු ඕවර 4 තුළ ලකුණු 47ක් ලබා දුන්නේය. කඩුළු 02ක් ලැබුවේය. දසුන් ශානක සහ දුනිත් වෙල්ලාලගේ එක් කඩුල්ල බැගින් ලැබූහ.
තරගාවලිය පරාදය. ලෝක කුසලානය ලබන සතියේය. අපට ගොක්කොල පෙනෙමින් ඇති බව පමණක් ලියා තැබිය යුතුය.
