වැලිගම ප්රාදේශීය සභාවේ සභාපති මිදිගම ලසා හෙවත් ලසන්ත වික්රමසේකර ඝාතනය සැලැස්මට මහජන ආරක්ෂක අමාත්ය ආනන්ද විජේපාලත් සම්බන්ධ දැයි තමන්ට සැක සිතෙන බව සමගි ජන බලවේගයේ පාර්ලිමේන්තු මන්ත්රී මුජිබර් රහුමාන් අද පාර්ලිමේන්තුවේ දී ප්රකාශ කළේය.
ඔහු කීවේ ඕනෑම ශිෂ්ට සම්පන්න සමාජයක දී පුද්ගල ඝාතනයක් සම්බන්ධව ශිෂ්ට සම්පන්න මිනිසුන් කණගාටුව පල කරන බවත් ඊයේ මහජන ආරක්ෂ ඇමතිවරයා විසින් පෙන්වා දුන්නේ ඝාතන සහ කැලෑ නීතිය අනුමත කරන අශිෂ්ටයින් ගේ වියරුව බවත්ය.
88-89 වකවානුවේ ගොඩනැගූ වෛරී හැසිරීම සහ ඒ ලේ වැකි සමාජය යළි නිර්මාණය වෙමින් පවතින බවට ඉඟි පහළවන බව පෙන්වා දුන් මන්ත්රීවරයා ප්රකාශ කළේ ලසන්ත වික්රමසේකරට අපරාධ චෝදනා තිබුණා නම්, වැරදි තිබුනා නම් නාම යෝජනා භාර දී මාස 03ක් සහ සභාපති ධූරය සහිතව මාස 03ක් ගත කළ කාලය තුළ චෝදනා ඉදිරිපත් කළ උසාවිය මාර්ගයෙන් කටයුතු කිරීමට තිබුණු බවය.
එසේ නොකර එම පුද්ගලයා ඝාතනය කළ පසු එම ඝාතනය සාධාරණීකරණය කරන ඇමතිවරයෙක් සමග පාර්ලිමේන්තුවේ එකට ඉඳගෙන සිටීමටත් තමන් ලජ්ජාවන බව මන්ත්රීවරයා කීවේය.
අපරාධ රාජ්යයක් ගැන ජනාධිපතිවරයා නිරන්තරව පවසන බව පෙන්වා දුන් මන්ත්රීවරයා අපරාධ රාජ්යයේ ගෝඩ් ෆාදර් පත් කරගැනීමට උපකාර කළේ එවකට ජනතා විමුක්ති පෙරමුණ බවත්, එම අපරාධ රාජ්ය නිර්මාණය කර දී දැන් ඇවිත් වැලපෙන ආණ්ඩුව අවසානයේ සිදුකර ඇත්තේ එම අපරාධ රාජ්යයේ කැලෑ නීතිය පවත්වාගෙන යෑම බවත් පැවසුවේය. ඔහු කීවේ ඒ සඳහා ජනාධිපති මාධ්ය අංශය ද මැදිහත් වී තිබීම පිළිකුල් සහගත බවය.
ඔහු මෙසේ ද කීවේය.
අප ඊයේ පෙරවරුවේ දි දැක්කා වැලිගම ප්රාදේශීය සභාවේ සමගි ජන බලවේගයේ සභාපති ලසන්ත වික්රමරත්න මැතිතුමා මහ දවල් ඝාතනය කළා. ඔහු රාජකාරියේ යෙදී සිටියදී තමයි ඔහුගේ මහජන දිනය පවත්වනකොට ඔහුගේ කාර්යාලයට ඇවිත් ස්වයංක්රීය ගිනි අවිවලින් ඔහුව ඝාතනය කළා.
ඔහු ඝාතනය කළේ ඔහු මන්ත්රීවරයෙක් සහ සභාපතිවරයෙක් ලෙස ඉන්නකොට තමයි. දැන් මේ ඝාතනය තුළ අපට පේන්න ගොඩාක් දේවල් තියනවා. අප දැක්කා මේ ඝාතනය සිදුවුනාට පස්සේ මේ ආණ්ඩුවේ මහජන ආරක්ෂක අමාත්යවරයා කතාව පටන් ගත්තේ පාතාලයෙන්. එතුමා ඇවිල්ලා සාමාන්යයෙන් ශිෂ්ට සම්පන්න සමාජයක මනුෂ්යයෙක් ඝාතනය වුනාම ශෝකය පල කරලා තමයි කතාව පටන් ගන්නෙ.
නමුත් තමුන්නාසේලා ලඟ අඩුම ගානේ ඒ ශිෂ්ට සම්පන්න ගතිගුණයවත් තිබුණෙ නෑ. පටන් ගත්තේම එතුමා පාතාලයේ කියලා හංවඩු ගහගෙන. ඒ විතරක් නෙමෙයි ඒ ඝාතනය සාධාරණීකරණය කළා. මම ලජ්ජා වෙනවා ඔබතුමා වගේ ඇමති කෙනෙක් එක්ක මේ පාර්ලිමේන්තුවේ වාඩිවෙලා ඉන්න ලැබීම ගැන.
ඔබතුමා ඇවිත් මේ ඝාතනය සාධාරණය කළා. ඔබතුමා ඇවිත් කතා කළේ ලසන්ත වික්රමසේකර ඝාතනය කළ ඝාතකයන් වෙනුවෙන්. එහෙම නැතිව ඒකට විරුද්ධව නෙමෙයි. ඔහුට අපරාධ චෝදනා තියනවා නම් ඔහුට නඩු තියනවා නම් ඔහුට වෙනත් ආකාරයේ ක්රියා තියනවා නම් ඔහුව උසාවියට දාලා ඔහුට දඬුවම් දෙන්න පුලුවන්. එහෙම නැතිව කාවවත් ඝාතනය කරන්න කාටවත් අයිතියක් නෑ.
දැන් ඔබතුමාලම කියනවා.. ජනාධිපති තුමාගේ පරණ කතාවල් අහලා බලන්න. එතුමා හැමදාම කිව්වේ කාවවත් මරන්න බෑ. ඒ මරන කෙනාගේ ඉතිහාසය වැඩක් නෑ. ඇයි එයාව මැරුවෙ කියලා. මොකක්ද තමුන්නාසේ කියන්නේ. තමුන්නාසේ කියනවා අර කොහෙන්ද ගෙනාපු සංවිධානාත්මක අපරාධකාරයෙක් කිව්වලු මෙතුමා ලඟ තුවක්කු තියනවා කියලා. දැන් සුමාන තුනක් වෙනවනේ. මෙතුමාව අත් අඩංගුවට ගන්න තිබුණා නේ.
එතුමා නාමයෝජනා දීලා සභාපති වෙලා මාස 06ක් වෙනවා. එතුමා අපරාධකාරයෙක් නම් එතුමාට නොයෙකුත් ආකාරයේ චෝදනා තියනවා නම් අත් අඩංගුවට අරන් උසාවියට දාන්න තිබුණනේ. එතුමා ඝාතනය කළාට පස්සේ දැන් මේ කියන්නෙ මොනවද . එකෙන් පෙන්වන්න තමුන්නාසේලා ශිෂ්ට සම්පන්න නෑ. තමුන්නාසේලා වෛරයෙන් 88 -89 දි තිබුණු වෛරී තත්ත්වය තවම තමුන්නාසේලාගේ හිත්වල තියනවා කියන එක මම මේ වෙලාවෙදි කියනවා. ඒකයි ඊයේ ඇමතිවරයා ඇවිත් එලියට දැම්මේ.
එතුමා අහන දේ තමයි එතුමා නාමයෝජනා දීලා මාස තුනක් හිටියා, සභාපති වෙලා මාස තුනක් හිටියා එහෙම වැරදි කරලා තියනවා නම් අත් අඩංගුවට අරන් උසාවියට ඉදරිපත් කරලා තිබුණා. එහෙම නැතිව එතුමාව ඝාතනය කරන්න අවශ්ය පරිසරය තමුන්නාසේ හැදුවා කියන සැකය අපට තියනවා කියලා අපි තමුන්නාසේට කියන්න කැමතියි.
තමුන්නාසේ වග කියන්න ඕන. තමුන්නාසේගේ කතාවෙන් තේරුනේ හොරාට කලින් කෙහෙල්කන වැට පැන්නා කියන කතාව. අන්න ඒ වගේ කතාවක් ඊයේ ඇමතිතුමා ඇවිත් කතා කළේ. හොරාට කලින් කෙහෙල්කන වැට පැන්නා. තමුන්නාසේ ඇවිත් ඊයේ ඝාතනය සාධාරණීකරණය කළා. ශිෂ්ට සම්පන්න සමාජයක් ඕක බලාපොරොත්තු වෙන්නෙ නෑ ගරු ඇමති තුමනි. ශිෂ්ට සම්පන්න සමාජයක මිනිහෙක් මැරුණා නම් මොන අපරාධකාරයෙක් උනත් ඒ මිනිහගේ මරණයට අපි ගෞරව කරනවා.
තමුන්නාසේලා ආවේ පොස්ත් රටක් ලස්සන ජීවිතයක් හදන්න. ශිෂ්ට සම්පන්න රටක් හදන්න. දේශපාලනයෙ අලුත් සංස්කෘතියක් හදන්න. ජනාධිපති තුමා හැමදාම කිව්වේ ඒක. මේකද ඔබතුමා ඉදිරිපත් කරපු අලුත් සංස්කෘතිය. මේ සංස්කෘතිය හදන්න ද මේ රටේ ජනතාව බලය දුන්නේ. ඒ සංස්කෘතිය තමයි තමුන්නාසේලා 2005 බලයට ගෙනාපු අය මේ අවුරුදු 10ක් 15ක් තිස්සේ ගෙනාපු සංස්කෘතිය. ඒක තමයි තමුන්නාසේලා ඉදිරියට ගෙනිහින් තියෙන්නේ.
කැලෑ නීතිය වෙනුවෙන් පෙනී සිටියා. කැලෑ නීතිය ආරක්ෂා කළා. වහාම අත් අඩංගුවට ගන්නවා කිව්වා. නීතියේ ඇමතිවරයාගෙ කටින් ආවේ නෑ. මැරච්චි මනුස්සයගේ ඉතිහාසය කිව්වේ නීතිය සම්බන්ධ ඇමති. ලජ්ජා වෙන්න ඕන ජනාධිපති තුමනි මේ වගේ ඇමතිවරු පත් කළාට. ජනාධිපති තුමාගේ මාධ්ය අංශයෙනුත් මේක කැම්පේන් කරනවා. සල්ලි දීලා හදපු කැම්පේන් කරනවා.
