නවසීලන්තයේ ඕක්ලන්ඩ්හි 2023 කීර්තිමත් ක්රීඩා, ප්රජා, කලා, සහ සංස්කෘතික සම්මාන උළෙලේදී Indian Newslink වෙතින් විශේෂ සමරු සම්මානයක් ශ්රී ලංකා ක්රිකට් ක්රීඩා ඉතිහාසයේ වර්ණනීය පුරාවෘතයක් පමණක් නොව, ගෞරවනීය මහත්මා චරිතයක් වූ කීර්තිමත් ශ්රී ලංකා ක්රිකට් ක්රීඩක රොෂාන් මහානාම වෙත පිරිනමන ලදී.
මෙම සම්මානය පිරිනමනු ලැබුවේ රොෂාන් මහානාම ක්රිකට් ක්රීඩාවට කළ විශිෂ්ට දායකත්වයට පමණක් නොව, මේ වනවිට රොෂාන් මහානාම භාරය හරහා ඔහු සිදුකරමින් ඇති විශිෂ්ට ප්රජා සත්කාර සේවය ඇගයීමකට ලක් කරමිනි.
දකුණු ඕක්ලන්ඩ් හි Papatoetoe හි ස්වාමිනාරායන් සංකීර්ණයේ පැවති මෙම උත්සවයට 650 කට අධික පිරිසක් පැමිණ සිටියහ. මෙම උත්සවයේදී ක්රීඩා, කලා, සංස්කෘතිය සහ ප්රජා ප්රයත්නයන් හි විශිෂ්ටතා දැක්වූ දකුණු ආසියාතික ප්රජාවේ පුද්ගලයින් 65 දෙනෙකු වෙත උපහාර දක්වා තිබිණි.
මෙම අවස්ථාවට පැමිණි සම්භාවනීය අමුත්තන් අතර මැති ඇමතිවරුන්, විපක්ෂ නායකවරයා, පාර්ලිමේන්තු මන්ත්රීවරුන්, නවසීලන්ත ක්රීඩා ඉතිහාසය තුළ කැපී පෙනෙන විශිෂ්ටයින් මෙන්ම ව්යාපාරික ප්රජාවේ ප්රමුඛ සාමාජිකයින්ද විය.
සම්මානය ලබා ගැනීම පිළිබඳව සිය කෘතඥතාව පළ කළ රොෂාන් මහානාම පැවසුවේ මෙම ගෞරවනීය සම්මානය ලැබීම පිළිබඳව තමා අතිශයින් නිහතමානීව ආඩම්බර වන බවය.
රොෂාන් මහානාම භාරය හරහා ක්රියාත්මක කර ඇති මානුෂීය ප්රයත්නයන් අවංක අධ්යාශයකින් යුතුව ඉදිරියට ගෙන යාමේ තමන්ගේ අධිෂ්ඨානය මෙම ඇගයිම හරහා ශක්තිමත් වූ බව ඔහු ප්රකාශ කළේය.
“ අභියෝගාත්මක කාලවලදී නවසීලන්ත ජනතාව ශ්රී ලංකාවේ ජනතාව කෙරෙහි දක්වන විශ්වාසය සහ නොසැලෙන සහයෝගය වෙනුවෙන් මේ උත්සවයේ සංවිධායකයින්ට මගේ හෘදයාංගම ස්තුතිය පුද කරනවා. ” ඔහු කිවේය.
