අසේල කුරුළුවංශ –
ශ්රී දළදා මාලිගාව කේන්ද්ර කර ගනිමින් ඉදිරි දස වසර තුළ ශාසනික උන්නතිය හා සමාජ සුබසාධනය වෙනුවෙන් විශාල වැඩ කොටසක් සිදු කිරීමට සැළසුම් කර තිබෙන බව ශ්රී දළදා මාලිගාවේ දියවඩන නිලමේ ප්රදීප් නිලංග දෑල පවසයි.
පළමු වරට ශ්රී දළදා මාලගාවේ දියවඩන නිලමේ ලෙස 2005 වසරේ දී පත්වන විට දළදා සමිඳුන් වැඳපුදා ගැනීම සඳහා දෛනිකව පැමිණයේ 2500 ක පමණ බැතිමතුන් සංඛ්යාවක් බවත් මේ වනවිට එම සංඛ්යාව 15000 ක් දක්වා ඉහළ නැන්වීමට හැකිවී තිබෙන ඔහු පැවසුවේය.
මහනුවර ශ්රී දළදා මාලිගාවේ දියවඩන නිලමේ ධුරයට තෙවැනි වරටත් පත්වීමෙන් අනතුරුව ඊයේ (08) පැවැති මාධ්ය හමුවකදී නිලංග දෑල මේ බව පැවසුවේය. විදේශ සංචාරකයින් 1500 ක පමණ පිරිසක් දෛනිකව දළදා මැදුරට පැමිණෙන බව ද ඔහු පෙන්වා දුන්නේය.
ශ්රී දළදා වහන්සේගේ ගිහි භාරකාරවරයා ලෙස නිලංග දෑල පසුගිය 07 දා තේරී පත්වූයේ වැඩි ඡන්ද 145 ක් ලබා ගනිමිනි. ගිහි බෞද්ධයින්ගේ නායකයා තෝරා පත්කර ගැනීම වෙනුවෙන් පසුගිය 07 දා සෙංකඩගල බෞද්ධ මන්දිරයේ දී පැවැති රැස්වීමේදී දමින්ද උඩුරාවණට ඡන්ද 50 ක් ද අයි. ඩබ්ලිව්.එස් බණ්ඩරනායකට ඡන්ද 13 ක්ද හිමි විය.
තෙවන වරටත් දියවඩන නිලමේ ධුරයට පත් ප්රදීප් නිලංග දෑල මෙසේද පැවසුවේය.
“මම දළදා මාලිගාවේ දියවඩන නිලමේ ලෙස 2005 දී මුල්වරට පත්ව එනවිට නිශ්චල ඡායාරූපයක් ගන්න අවශ්යය කැමරාවක් මාලිගාවේ තිබුණේ නැහැ. අද දළදා මාලිගාව සතුව සියලු පහසුකම් වලින් සමන්විත මාධ්ය කාර්යාංශයක් තිබෙනවා. “
“දළදා මාලිගාවේ වෙබ් අඩවිය තිබුණේ පෞද්ගලික අංශය සතුවයි. අද ලොව පුරා මිලියන 100 ක පමණ පිරිසක් දළදා මාලිගාවේ වෙබ් අඩවිය ඔස්සේ මහනුවර ඇසළ පෙරහර සජීවිව නරඹනවා. වැඩිම සංචාරක ආකර්ෂණයක් දිනාගත් ස්ථාන අතරින් 2013 දී ශ්රී දළදා මාලිගාව ලෝකයෙන්ම පළමු තැනට පැමිණයේ ටජ්මහල දෙවැනි තැනට පත් කරමින්.”
“ සාර්ථක වසර 10 කින් පසු 2015 දී මා යළිත් දළදා මාලිගාවේ දියවඩන නිලමේ ධුරයට පත්වුණා. අපේ සාර්ථකම වසර ලෙස 2018 අවුරුද්ද හඳුන්වන්න පුළුවන්. ඒ වසරේ දී අපේ ආදායම් විශාල ලෙස ඉහළ ගියා. ඒත් සමඟ පාස්කු ප්රහාරය එල්ල වුණා. ඉන් පසු යම්තම් හිස ඔසවත්දී කොවිඩ් වසංගතයට මුහුණ දෙන්න සිදු වුණා. රට සෑහෙන කාලයක් වසා තිබීම නිසා දළදා මාලිගාවට පැමිණෙන පිරිස අඩු වුණා. චාරිත්ර පෙර පරිදිම ඉටු කරමින් අභියෝග මධ්යයේ සේවක වැටුප් පෙර පරිදිම ගෙව්වා.ඒ අසීරු කාලපරිච්ඡේදයෙන් පසු නැවත හරියට වැඩක් කරන්න පසුබිම සකස් වුණේ 2023 ඔක්තෝම්බර් මාසයේ සිටයි.”
“එතැන් සිට ගෙවුණු වසර දෙකේදී අපට දැවැන්ත සාර්ථකත්වයක් ලබා ගන්න පුළුවන් වුණා. උඩරට රාජධානි සමය නිරූපිත ඉටි රූප කෞතුගාරය විවෘත කරන්න අපට අවස්ථාව ලැබුණා. මූල්ය ප්රතිපාදන නිසි කළමනාකරණයට ලක් කිරීම ඔස්සේ 2024 මැයි වනවිට රුපියල් බිලියනක ඉලක්කය සපුරා ගන්න පුළුවන් වුණා.”
