සනත් ප්රියන්ත –
රට තුළ පැවති සිවිල් යුද්ධය මීට වසර 15 කට පෙර යුදමය වශයෙන් නිමාවුයේය. යුද්ධය නිමා වූ දිනය ලෙස සැලකෙන්නේ හෙට දිනය ය. එනම් මැයි මස 18 වැනිදා ය.
යුද්ධයේ අවසන් සමයේදී දමිළ ජනතාව විශාල පිරිසක් මුලතිව් මුල්ලිවයික්කාල් වෙරළ සීමාවේ සීමිත ඉඩකට කොටු වී සිටියහ. ඒ භූමිය තුළ කුඩු වී යුධ හමුදාව හා එල් ටී ටී සංවිධානයේ ප්රහාරයන්ට මැදිව සිටි සිවිල් ජනතාව අතුරින් බොහෝ පිරිසක් ජිවිතක්ෂයට පත්වු වූහ.
අවසන් යුද සමයේ උතුරු නැගෙනහිර ජනතාව වෙත භාණ්ඩ හා සේවා සැපයීම ඇනහිටීම හේතුවෙන් සහල් මිටක් හෝ සපයාගත නොහැකි වී තිබිණි. සියලු දේ අත්හැර පැමිණි ලක්ෂ තුනකට ආසන්න පිරිසක් මේ භූමියේ රැස් වී සිටියහ. නිවෙස්වලින් එනවිට සහල් පමණක් රැගෙන පැමිණි මිනිස්සු වූහ. සහල් මිටක් සඳහා රන් පවුම් හුවමාරු වෙන අවස්ථා නිර්මාණය වී තිබිනි. මිනී මතින් පැමිණ ජිවත්වීම සඳහා මුහුදු වතුරෙන් තම්බාගත් සහල් කැඳ පානය කරමින් දුෂ්කර ක්රියා කළ මිනිස්සුන්ගෙන් දිවි බේරාගත් උන්ට ජීවිතය හැර සියල්ල අහිමි වී තිබිණි.
යුද්ධය අවසන්වීමේ ජයග්රාහි සැමරුම පිරිසක් සමරන අවස්ථාවේ, උතුරු නැගෙනහිර ජනතාව යුද්ධයේ අවසන් දිනවල තමන් ගෙවු අමිහිරි මතක සිහි කරමින් විවිධ ස්මරණයන් පවත්වති. පසුගිය වසර 15 ක කාලය තුළම සෑම වසරකම මැයි මස 11 වැනිදා සිට මැයි 18 වැනිදා දක්වා මේ සැමරුම් දියත් කරති.
අවසන් සැමරුම් උළෙල හෙටය. මේ ඒ අවස්ථාව සඳහා සූදානම් වෙමින් සිටිනා ජනතාවය.
