ඊශ්රායලය සමඟ පවතින ගැටුම මධ්යයේ සිකුරාදා උතුරු ඉරානයට රිච්ටර් මාපකයේ 5.1 ක භූමිකම්පාවක් ඇති විය.
භූමිකම්පාව සෙම්නාන් නගරයේ සිට කිලෝමීටර් 37 ( සැතපුම් 23) ක් නිරිත දෙසින් කිලෝමීටර් 10 ක් ( සැතපුම් 06ක් ) ගැඹුරින් සිද්ධ වූ බව එක්සත් ජනපද භූ විද්යා සමීක්ෂණ ආයතනය පැවසීය.
ඉරානයේ ප්රවෘත්ති ඒජන්සිය වන IRNA වාර්තා කළේ කිසිදු ජීවිත හානියක් සිදු නොවූ බවත් සිදුවූයේ “අවම හානියක්” පමණක් බවත් භූමි කම්පාවෙන් “සෙම්නාන් පළාතේ සෝර්කේ නගරය අවට ප්රදේශය සෙලවූ” බවත්ය.
මෙම භූමි කම්පාව සිද්ධ වන්නේ ඉරානය සහ ඊශ්රායලය අතර මිසයිල හුවමාරු වන ආතතීන් ඉහළ යමින් පවතින අතරය.
කෙසේ වෙතත් ඉරානය යනු ලෝකයේ භූ කම්පන වැඩිවශයෙන් සිදුවන රටවල් අතර ඇති රටකි. එම භූ කම්පනවලට හේතුව අරාබි සහ යුරේසියානු භූ කම්පන තහඩු එක්වන ඇල්පයින්-හිමාලයානු භූ කම්පන තීරය මත ඉරානය පිහිටීමය.
භූ කම්පන ඉරානයට අමුත්තක් නොවේ. ඉහත භූ කම්පන කලාපය තුළ පිහිටීම හේතුවෙන් රටේ නිතර භූමිකම්පා ඇති වන්නේය. රට සෑම වසරකම සාමාන්යයෙන් භූමිකම්පා 2,100 ක් පමණ අත්විඳිනු ලබන බව වාර්තා වන්නේය. දළ වශයෙන් දිනකට සුලු භූ කම්පන 5ක් පමණ සිදුවන්නේය. එමෙන්ම වසරකට රික්ටර් මාපකයේ 5.0 හෝ ඊට වැඩි විශාලත්වයකින් යුත් භූමිකම්පා 15 සිට 16 දක්වා ප්රමාණයක් ද ඉරානය අත් විඳින්නේය.
