(ලලිත් චාමින්ද)
මත්පැන් නිෂ්පාදන ආයතන 04ක් විසින් 2022 වර්ෂය අවසානය දක්වා කාලය තුළ හිඟ සුරාබදු හා ප්රමාද ගාස්තු වශයෙන් රුපියල් දෙසිය තිස්අටකෝටි, අනූහයලක්ෂ, අනුදෙදහස් දෙසිය පනස්හතක (2,389,692,257) මුදලක් ගෙවිය යුතු වුවත් එම ගෙවිම් පැහැර හැර ඇති බව ජාතික විගණන කාර්යාලය මගින් නිකුත්කොට ඇති නවතම විගණන වාර්තාවක සදහන් වේ.
මෙකි හිග සුරාබදු හා ප්රමාද ගාස්තු වසර 05ක වැඩි කාලයක සිට සුරාබදු දේපාර්තමේන්තුවට අයකර ගැනීමට නොහැකි වී ඇති බවද විගණනය මගින් අනාවරණය කොට ඇත. මින් ආයතන තුනකට අදාලව නඩු පැවරිමට අවශ්ය මූලික කරුණු කෙටුම්පත් කරන අවස්ථාවේ දි හිග සුරාබදු හා ප්රමාද ගාස්තු ගෙවීම පිළිබද එකගතාවයක් ඇතිකරගෙන තිබුනද අදාල ආයතන විසින් එම එකගතාවය කඩකර හිග බදු හා ප්රමාද ගාස්තු ගෙවීම පැහැර හැර තිබු බවද විගණන වාර්තාවේ සදහන් වේ.
එමෙන්ම නිෂ්පාදන කටයුතු අත්හිටුවා ඇති එක් සැර මත්පැන් නිෂ්පාදන සමාගමක් සදහා 2022 වර්ෂයේ දි නිෂ්පාදන කටයුතු ආරම්භ කිරීම සඳහා අනුමැතිය ලබා දී තිබුණි. එකී සමාගමෙන් 2022 වර්ෂයේ අවසන් දිනට අයවිය යුතු හිඟ බදු මුදල රුපියල් එකසිය විසිනම කෝටි,විසිඅටලක්ෂ,හැත්තැහත්දහස් එකසිය තිස්අටකි. (1,292,877,138) අයවිය යුතු ප්රමාද ගාස්තු මුදල රුපියල් එකසිය හතලිස් පන්කෝටි,හැටලක්ෂ,හැත්තැනමදහස් හතලිහක් (1,456,079,040) ක් බවද විගණන වාර්තාවේ සදහන් වේ.
