අද (31) උදෑසන 6ට පමණ කළුතර නාගොඩ ශික්ෂණ රෝහල තුළ බන්ධනාගාර රැඳවියෙක් ඉලක්ක කරගෙන වෙඩි තැබීමක් සිදු කර තිබේ.
ඉලක්ක කරගෙන ඇත්තේ රෝහලේ ප්රතිකාර ලබමින් සිටි නාරායනගේ දිලිප් චතුරංග නොහොත් “රජවත්තේ චතුවා” නැමැත්තෙකි.
ඔහු දෙසැම්බර් 13 වනදා මත්ද්රව්ය චෝදනාවක් සම්බන්ධයෙන් කළුතර දකුණ පොලීසිය විසින් අත්අඩංගුවට ගෙන කළුතර මහෙස්ත්රාත් අධිකරණයට ඉදිරිපත් කිරීමෙන් පසු රක්ෂිත බන්ධනාගාර කර තිබිණි.
රජවත්තේ චතුවා රෝහල්ගත කරනු ලබන්නේ පෙරේදා (29) බන්ධනාගාර රැඳවියන් පිරිසකගේ පහර කෑමට ලක් විමෙනි. ප්රහාරයෙන් තුවාල ලද මෙම පුද්ගලයා කළුතර නාගොඩ ශික්ෂණ රෝහලට ඇතුළත් කළ අතර ඔහු රෝහලේ 14 වාට්ටුවේ ප්රතිකාර ලබමින් සිට ඇත. අංක 14 වාට්ටුව ශල්ය වාට්ටුවකි.
විශේෂත්වය වන්නේ රජවත්තේ චතුවා බන්ධනාගාර නිලධාරීන්ගේ ආරක්ෂාව යටතේ පාදයට මාංචු යොදා ඇඳට සීමා කර ප්රතිකාර ගනිමින් සිටිය දී රෝහල තුළට පැමිණි වෙඩික්කරුවෙක් ඔහුට වෙඩි තබා පලා යෑමය.
බන්ධනාගාර නිලධාරීන් බලා සිටියදීම නාඳුනන තුවක්කුකරුවෙකු රොවෝල්වර් වර්ගයේ ගිනිඅවියකින් වෙඩි ප්රහාරය එල්ල කර රෝහලේ තාප්පයට උඩින් පැන පලාගොස් ඇති බවට මෙතෙක් කළ පරීක්ෂණවලදී හෙළිව ඇතැයි පොලිසිය කියයි.
වෙඩි ප්රහාරය එල්ල වී තිබුණේ රැඳවියාගේ උදරය ප්රදේශයට ය. මේ වනවිට වෙඩි ප්රහාරයට ලක්ව බරපතල තුවාල ලද රැඳවියා ශල්යකර්මයකට භාජනය කරමින් ඇතැයි රෝහල් ආරංචි මාර්ග පවසයි.
කළුතර අපරාධ කොට්ටාසය, විශේෂ කාර්ය බළකා නිලධාරින්, අපරාධ ස්ථාන පරීක්ෂණාගාර නිලධාරින්ද පරීක්ෂණ සඳහා කැඳවා විමර්ශන ආරම්භ කර ඇත.
