මනම්පිටිය නිමල් ජයරත්න –
-
වසර 21ක නඩු විභාගයෙන් පසු තීන්දුව එනකොට කොට්ඨාස විමර්ශන අංශ ස්ථානාධිපති මිය ගිහින්….
වැටලීමක් සඳහා ගිය අවස්ථාවේදී පොළොන්නරුව රන්කෙත හෝටලයේ කළමණාකාරවරයා සමඟ ඇතිවූ ආරවුලක් මත සිදුකළ පහර දීමකින් පසු එම හෝටල් කළමනාකාරවරයා මරණයට පත් කිරීමේ චෝදනාව පිළිබඳ සිදුකළ වසර විසි එකක දීර්ඝ නඩු විභාගයෙන් අනතුරුව, පොළොන්නරුව කොට්ඨාස අපරාධ විමර්ශන අංශයේ ස්ථානාධිපතිවරයා ඇතුළු පොලිස් නිලධාරින් සිව්දෙනෙකුට රුපියල් 15,000 බැගින් වූ දඩ මුදලක් ගෙවන ලෙසත්, ඔවුන්ට වසර හතක බරපතල වැඩ සහිත සිරදඬුවම් ලබා දෙන ලෙසත් පොළොන්නරුව මහාධිකරණ විනිසුරු රුචිර වැලිවත්ත නියෝග කළේය.
2004 ඔක්තෝබර් 03 වෙනිදා පොළොන්නරුව කොට්ඨාස අපරාධ විමර්ශන අංශයේ ස්ථානාධිපති උප පොලිස් පරීක්ෂක වසන්ත පෙරේරාත් පොලිස් සැරයන්වරයෙකු සහ පොලිස් කොස්තාපල්වරුන් දෙදෙනෙකුත් පොළොන්නරුව රන්කෙත හෝටලයේ වැටලීමකට ගිය අවස්ථාවේදී ඇතිවූ ආරවුලකින් පසු පොලිස් නිලධාරින් පහර දී හෝටල් කළමනාකරුවන හර්මන් කුවින්ටස් පෙරේරා මරණයට පත්විය.
මරණයට පත්වෙමින් අනතුරුව 2004 ඔක්තෝබර් 03 වෙනිදා කොට්ඨාස අපරාධ අංශයේ පොලිස් ස්ථානාධිපතිවරයා ඇතුළු සිව්දෙනා පොළොන්නරුව මහේස්ත්රාත් අධිකරණයට ඉදිරිපත් කිරීමෙන් අනතුරුව රක්ෂිත බන්ධනාගාරගත කෙරිනි.
පොළොන්නරුව මහාධිකරණයේ ගොනුවන මේ නඩුව නීතිපතිවරයාගේ උපදෙස් ලැබීමෙන් අනතුරුව 2006 අගෝස්තු 17වෙනිදා පළමුවරට විභාගයට ගැනිණි.
ඒ අනුව දීර්ඝ නඩු විභාගයකින් අනතුරුව ඉකුත් 12 වෙනිදා නඩුව කැඳවූ අවස්ථාවේදී, සාවද්ය මනුෂ්ය ඝාතනයක් සිදු කිරීමේ චෝදනාව මත පොළොන්නරුව කොට්ඨාස අපරාධ විමර්ශන අංශයේ ස්ථානාධිපති වසන්ත පෙරේරා ඇතුළු පොලිස් නිලධාරින් සිව්දෙනාට වසර හතක බරපතල වැඩ සහිත දඬුවම් ලබාදෙන ලෙසට පොළොන්නරුව මහාධිකරණ විනිසුරු රුචිර වැලිවත්ත නියෝග කළේය.
මෙම නඩු තීන්දුව ලබාදෙන අවස්ථාව වන විට ,පොළොන්නරුව කොට්ඨාශ අපරාධ විමර්ශන අංශයේ ස්ථානාධිපතිවරයා, වසන්ත පෙරේරා මියගොස් ඇති අතර, චෝදනාවට ලක්ව සිටින පොලිස් සැරයන්වරුන් දෙදෙනෙකු වැඩ තහනමකට ලක්ව සිටින බවත්, පොලිස් කොස්තාපල්වරයෙකු මඩකලපුව පොලිස් අධිකාරී කාර්යාලයේ සේවයේ නිරතව සිටින බවත් පොලිසිය කීවේය.
