මනම්පිටිය නිමල් ජයරත්න –
පොළොන්නරුව දිස්ත්රික්කයේ වසර ගණනාවක සිට සිංහල, දමිළ, මුස්ලිම්, ආදිවාසී, හා තෙලිඟු ජනතාවගේ නොවිසඳුනු ගැටලුවලට පිළියම් සෙවීම සඳහා ඒකාබද්ධව විශේෂ කමිටුවක් පිහිටුවා ගෙන ඇත.
පොළොන්නරුව දිස්ත්රික්කයේ ප්රාදේශීය ලේකම් කොට්ඨාස හතක ග්රාම සේවා වසම් දෙසීය අනූපහක සිටින ආගමික නායකයින් සම්බන්ධ කර ගනිමින් ඔවුන් හරහා එන ජනතා ගැටලු කමිටුව මගින් රාජ්ය ආයතනවලට යොමු කර විසඳුම් ලබාගැනීම මෙහි එක් අරමුණක් බව ශ්රී ලංකා ජාතික සාම මණ්ඩලයේ කළමනාකාරිනි නිරෝෂා ඇන්තනි සඳහන් කළාය.
පොළොන්නරුව නව නගරයේ කිතුනු දේවස්ථානයේ පසුගියදා පැවැති අන්තර් ආගමික කමිටු රැස්වීමේදී රැස්වූ ආගමික නායකයන් ඇතුළු සිවිල් ප්රජා සංවිධාන ඒකාබද්ධව මෙම කමිටුව පිහිටුවා ගනු ලැබූහ.
ඒ අනුව සියලු ජාතීන් පොදුවේ මුහුණ දෙන පොදු ගැටලු විසඳාගැනීමත්, වසර ගණනාවක සිට ගම්මානවල හා ග්රාම සේවා වසම් මට්ටමින් කාන්තාවන්, දරුවන් ළමුන්, ඇතුළු විවිධ ජාතීන් පොදුවේ මූණ දෙන ගැටලු වලට, රාජ්ය සංවිධාන මැදිහත් කර ගනිමින් විසඳාගත හැකි ගැටලු ඒ මොහොතෙම විසඳා ගැනීම මෙහි තවත් අරමුණක් බවද නිරෝෂා ඇන්තනී සඳහන් කළාය.
මෙම අවස්ථාවට පොළොන්නරුව දිස්ත්රික්කයේ බෞද්ධ, හින්දු, ඉස්ලාම්, ආගමික නායකයින්, ව්යාපෘති නිලධාරිනී චාමිනී වීරසිරි, අයේෂා ජයවර්ධන, අන්තර් ආගමික කමිටුවේ පොළොන්නරුව දිස්ත්රික් සම්බන්ධීකාරික චන්ද්රා සෙනෙවිරත්න, සිවිල් ක්රියාකාරීන් ඇතුළු දිස්ත්රික්කයේ ස්වේච්ඡා සංවිධාන නියෝජනය කරමින් කිහිපදෙනෙකුම සහභාගි වී සිටියහ.
