කීර්ති ප්රනාන්දු – මීරිගම –
පසුගිය 02 දා පැහැරගෙන ගොස් අතුරුදන් කළ බව කී හංවැල්ල තුන්මෝදර කොස්කන්ද ආරණ්ය සේනාසනාධිපතිව වැඩ විසූ උඩුවිල ධම්මසිරි හිමිගේ සිරුර කොටදෙණියාව මීරිගම නාවාන පොදු සුසාන භූමියේ මිනී වළක් මත පිළිස්සෙමින් තිබිය දී ඊයේ සවස (04) කොටදෙණියාව පොලිසිය විසින් සොයාගෙන තිබිණි.
ඉක්තු 02 දා දහදෙනෙකුට ආසන්න පිරිසක් ආරණ්යයට කඩා වැදී හිමියන්ට පොළුවලින් පහර දී පැහැරගෙන ගොස් තිබිණි. හිමියන් අතුරුදන් වූ බව වාර්තා විය.
මේ අතර නාවාන පොදු සුසානභූමියේ මිනී වළක් මත නාඳුනන පුද්ගලයෙකුගේ මිනියක් දැවෙමින් ඇති බවට කොටදෙණියාව පොලිසියට තොරතුරක් ලැබිණි. සිරුරේ මුහුණත් ශරීර කොටසුත් බරපතල ලෙස පිලිස්සී ඇති නිසා හඳුනාගත නොහැකි තත්වයක පැවතිනි.
සිරුර මීගමුව රෝහලේ මෘතශරීරාගාරයේ තැන්පත් කර මේ සිරුර අතුරුදන් වූ හිමියන්ගේ යැයි සැක පිට ආරණ්ය සේනාසනයට මේ සිද්ධිය දැනුම් දී ඇත. ආරණ්ය සේනාසනයේ වැඩ වෙසෙන ජයවර්ධන පුර සරසවියේ අධ්යාපනය ලබන ගල්නෑවේ සිරිසෝම (23) නැමැති හිමි නමක් දත්වලින් හා කකුල්වල නියපොතු කපා තිබූ ආකාරයෙන් මේ සිරුර තම නායක හාමුදුරුවන්ගේ බව හඳුනාගත් බව කොටදෙණියාව පොලිස් ස්ථානාධිපති ප්රධාන පොලිස් පරීක්ෂක එම්.පුෂ්පකුමාර පැවසීය.
සිරුර පළිබඳ පශ්චාත් මරණ පරීක්ෂණය මීගමුව රෝහලේ අධිකරණ වෛද්ය නිලධාරීවරයා විසින් අද (05) පැවැත්වීමට නියමිතව ඇත.
හිමිනම ඝාතනය කිරීමට හේතුව තවම සොයාගෙන නැති බවත් මේ වනවිට සිද්ධිය සම්බන්ධව සැක පිට එක් පුද්ගලයෙක් සමග හිමිනම පැහැරගෙන ගිය වෑන් රථය අත්අඩංගුවට ගෙන ඇති බවත් පොලිසිය කීවේය.
අත්අඩංගුවට ගත් පුද්ගලයා හොරණ කිරිගල පදිංචිකරුවෙකි. ඔහු ආරණ්ය සේනාසනයේ වැඩ විසූ 12 හැවිරිදි සාමනේර හිමි නමකගේ පියා බව පරීක්ෂණවලදී හෙළි වී තිබේ.