බදු නොගෙවු අරක්කු සමාගම්වලට හිඟ බදු ගෙවීම සඳහා ලබා දුන් කාලය නොවැම්බර් මස 30 වන දින අවසන් වූ බවත් සමාගම් තුනක් හැර අනෙක් සියලු සමාගම් මත්පැන් බලපත්රවලට අදාළ හිඟ සුරාබදු ගෙවා ඇති බවත් සුරාබදු දෙපාර්තමේන්තුව පවසයි.
එම දෙපාර්තමේන්තුව පෙන්වා දී ඇත්තේ මෙම වර්ෂයට අදාළ ව මත්පැන් නිෂ්පාදන සමාගම් 23ක් සඳහා නිෂ්පාදන බලපත්ර නිකුත් කර ඇති අතර පවසන සුරාබදු දෙපාර්තමේන්තුව සුරාබදු ආඥා පනතට අනුව සුරාබදු ගෙවීම් පැහැර හැරි සමාගම්වල නිෂ්පාදන කටයුතු අත්හිටුවා නිෂ්පාදන බලපත්ර ඊලඟ වර්ෂය සඳහා දීර්ඝ නොකිරීමටත් කටයුතු කරන බවය.
ඒ අනුව වැලිසර ඩබ්ලිව්. එම්. මෙන්ඩිස් සහ සමාගම, කුරුණෑගල රෝයල් සිලෝන් ඩිස්ටලරීස් පුද්ගලික සමාගම සහ මීගොඩ මැකලම් බෘවරි සමාගම යන සමාගම් තුන මෙසේ බදු නොගෙවා පැහැර හැර තිබේ. එම සමාගම්වලට එරෙහිව අධිකරණ ක්රියාවලියකට යොමුවී ඇති බවද සුරාබදු දෙපාර්තමේන්තුව පවසයි.
අදාළ නඩු තීන්දුවලට අනුව එම සමාගම් සම්බන්ධයෙන් ඉදිරි ක්රියාමාර්ග ගැනීමට ද නියමිතය.
සුරාබදු දෙපාර්තමේන්තුව සඳහන් කර ඇත්තේ දැනට ක්රියාත්මක නොවන ලුණුවිල ග්ලෝ බ්ලෙන්ඩර්ස්, වයඹ ස්ප්රීතු සමාගම සහ පයාගල සමූපකාර මත්පැන් නිෂ්පාදනාගාරවලට අදාළ සමාගම් සම්බන්ධ අයිතිය තහවුරු කර ගැනීමේ කටයුතු ආරම්භ කර ඇති අතර ඉන්පසු එම සමාගම්වලට අදාළ හිග බදු අයකර ගැනීම සඳහා පියවර ගන්නා බවය.
ඊට අමතරව උතුරු පළාතේ වංකානේ පිහිටි වලිකාමම් මත්පැන් නිෂ්පාදනාගාරයට අදාළ හිග සුරාබදු ගෙවන තෙක් මත්පැන් නිෂ්පාදන කටයුතු අත්හිටුවීමට ද පියවර ගෙන තිබේ. – දෙරණ
