යුක්රේනයේ කාර්කිව් නගරයට අද පෙරවරුවේ එල්ල වූ ෂෙල් වෙඩි පුහාරයකින් ඉන්දියානු වෛද්ය ශිෂ්යයකු මියගොස් ඇති බව ඉන්දීය මාධ්ය වාර්තා කරයි. 21 හැවිරිදි වෛද්ය ශිෂ්යයකු වන ඔහු කාර්කිව් හි ජාතික වෛද්ය විදයාලයේ අවසන් වසරේ සිටි වෛද්ය සිසුවකු වූ අතර ඔවුන් රැඳී සිටි ස්ථානයට අද උදෑසන ෂෙල් වෙඩි ප්රහාරයක් එල්ල වී ඇති බව යුක්රේන බලධාරීන් විසින් ඉන්දියානු රාජ්ය තාන්ත්රික අංශ වෙත නිල වශයෙන් දැනුම් දීමක් කර ඇත.
ඔහු කර්ණාටක ප්රාන්තයේ ප්රධාන නගරයට ආසන්න හාවේරි හි පදිංචිකරුවකු වන නවීන් ෂේකරප්පා ගෙයන්දවුර් ලෙසින් හඳුනාගෙන ඇති අතර ඔහු රැඳී සිටි ගොඩනැගිල්ල ඉදිරිපිට රැකවළෙහි සිටි සෙබලුන් පවසා ඇත්තේ එම ගොඩනැගිල්ල ෂෙල් වෙඩි ප්රහාරයකට ලක් වූ බවය.
ඔහු ගේ මරණයත් සමඟ යුක්රේනයේ රැඳී සිටින සිසුන් ඇතුළු ඉන්දියානුවන් මුදා ගැනීමේ මෙහෙයුම් තීව්ර කිරීම පිළිබඳව ඉන්දීය රජයේ අවධානය යොමු ව ඇති බව ඉන්දීය මාධ්ය වාර්තා කරයි. මේ වනවිට ඉන්දීය විදේශ ලේකම් හර්ස් වර්ධන් ශ්රිංග්ලා යුක්රේන සහ රුසියානු තානාපතිවරුන් සමඟ මෙම සිසුන් ඇතුළු ඉන්දියානුවන් ආරක්ෂිතව යළි ඉන්දියාව බලා ගෙන්වා ගැනීම කෙරෙහි අවධානය යොමු කර ඇති බව සදහන් වේ.
යුක්රේනයේ දෙවන විශාලතම නගරය වන කාර්කිව් හි පමණක් ඉන්දියානු සිසුන් 4000කට ආසන්න ප්රමාණයක් සිටි බව සඳහන් වේ. ඉන්දියාව මේ වනවිට ගංගා නමින් යුක්රේනයේ සිටින ඉන්දියානුවන් යළි මව් රට ගෙන්වා ගැනීමේ මෙහෙයුමක් ආරම්භ කර ඇති අතර රජය නිවේදනයක් නිකුත් කරමින් සඳහන් කර සිටියේ කිව් නුවර සිටින ඉන්දියානුවන්ට වහා එම ප්රදේශයෙන් ඉවත් වන ලෙසය. දුම්රිය සේවය හෝ වෙනත් ආරක්ෂිත මාර්ගවලින් මෙම පුදේශය අතහරින ලෙසත් ඉන්දීය තානාපති අංශ සමඟ සම්බන්ධතා පවත්වා ගන්නා ලෙසත් රජය ඔවුන් වෙත දැනුම් දෙනු ලැබ ඇත.
