නොරච්චෝලේ බලාගාරය සඳහා ගල් අඟුරු මිලදී ගැනීම සඳහා උත්සාහ කළ ගනුදෙනුව සිදු වූවා නම් එයින් ඇමෙරිකානු ඩොලර් මිලියන 459ක පමණ අලාභයක් සිදුවන්නට ඉඩ තිබූ බව හිටපු බලශක්ති අමාත්යවරයකු වන පාර්ලිමේන්තු මන්ත්රි පාඨලී චම්පික රණවක පෙන්වා දෙයි.
ටෙන්ඩරය සඳහා තෝරා ගැනුණු සමාගම රුසියාවෙන් ගෙන්වන ගල් අඟුරු සඳහා රුසියානු මිල දර්ශකය මත පදනම්ව ගල් අඟුරු ටොන් එකකට මිල ඉදිරිපත් නොකොට සංයුක්ත මිල දර්ශකයක් (කොම්පොසයිට්) අනුව මිල නියම කිරීම හේතුවෙන් එම ගනුදෙනුව සිදුවූවා නම් එක් මෙට්රික් ටොන් එකකට ඇමෙරිකානු ඩොලර් සියයකට වැඩි මිලක් පෙන්වා ඇතැයිද මන්ත්රිවරයා කෝප් කමිටුව හමුවේ පෙන්වා දුන්නේය.
එහිදී තවදුරත් අදහස් දැක්වූ පාඨලි චම්පික රණවක මන්ත්රිවරයා මෙසේ ද කීවේය.
“ඔවුන් ඉදිරිපත් කර ඇති ගල් අඟුරු ටොන් එකක සංයුක්ත මිල දර්ශකය අනුව මිල ඩොලර් 284.84යි. නමුත් මේවා රුසියානු මිල දර්ශකය අනුව ටොන් එකක් ඩොලර් 179.55ක්. රුසියාවෙන් ගන්න ගල්අඟුරු රුසියානු මිල දර්ශකය අනුව යොදන්නේ නැතිව මේ සංයුක්ත මිල දර්ශකය අනුව බැලුවාම ටොන් එකක් ආසන්න වශයෙන් ඩොලර් සියයක් මිල වැඩියි.
මේ ගනුදෙනුවේ ප්රමාණය ගල් අගුරු ටොන් මිලියන 4.5ක් . ඒ අනුව මේ ගනුදෙනුව සිදු වුණානම් ඩොලර් මිලියන 450ක වෙනසක් තිබෙනවා. ඩොලර් මිලියන 450කින් අපේ රටේ මාසකෙට අවශ්ය මොන තරම් දේවල්කරන්න තිබෙනවද?. මේ ලංසු මිල අඩු කිරීමට අවස්ථාවක් තිබියදී ඒ ගැන උත්සාහයක්වත් ගෙන නොමැති බව විගණකාධිපතිවරයා නිරීක්ෂණය කර තිබෙනවා. “ යැයිද මන්ත්රීවරයා කීවේය.
තමන් මෙම විගණකාධිපති වාර්තාව සමපූර්ණයෙන්ම කියවූ බවත් ගල අඟුරු සමාගමේ නිලධාරීන් කැඳවා මේ ගැන විමසිය යුතු බවත් ඔහු එහිදී අවධාරණය කළේය.
