මනම්පිටිය නිමල් ජයරත්න –
මඩකලපුව දිවුලපතාන ගම්වාසීන් තම ගම්මානයේ මීට දින තුනකට ඉහතදී තැන්පත් කරන ලද බුදුපිළිමය අතුරුදහන් වීම පිළිබඳ සොයා බැලීමට ඊයේ (19) මඩකලපුව ශ්‍රී මංගලාරාමාධිපති පූජ්‍ය අම්පිටියේ සුමනරතන හිමියන් එම ගම්මානයට පිවිසීමත් සමග එම ප්‍රවේශය අවහිර කරමින් ආරක්ෂක අංශය මගින් දිඹුලාගල වලමණ්ඩිය පාලම අවහිර කිරීම හේතුවෙන් සුමන හිමියන් සහ කරදියනාරු පොලිසියේ පොලිස් ස්ථානාධිපතිවරයා අතර උණුසුම් වචන හුවමාරුවක් ඇති විය.
මඩකලපුව දෙමළ සන්ධාන පාර්ලිමේන්තු මන්ත්‍රී ශානක්කියන් රාසමාණික්‍යයන් පසුගිය දා පාර්ලිමේන්තුවේදී ප්‍රකාශ කර තිබුණේ මඩකලපුව දිවුලපතාන ප්‍රදේශයට භික්ෂූන්ට යෑමට අවසර ලබා නොදෙන ලෙසට ජනාධිපතිවරයාගෙන් ඉල්ලා සිටි බවත් ජනාධිපතිවරයා ඊට අනුමැතිය ලබා දුන් බවත්ය.
ප්‍රශ්නය ඇති වන්නේ මේ පසුබිම තුළ සුමන හිමියන් එම ගම්මානයට ඇතුළත්වීමට කටයුතු කිරීමත් සමඟය.
අම්පිටියේ සුමනරතන හිමියන් ප්‍රමුඛ පිරිසක් දිවුලපතාන ගම්මානයට පිවිසෙන වලමණ්ඩිය යුද හමුදා කඳවුර ආසන්නයේ ශ්‍රි ලංකා පොලීසිය සහ යුදහමුදාවෙ 300 ක් පමණ ඒකරාශී වීමෙන් එම ගමට යෑමට ඉඩ නොදීමත් සමග සුමනරතන හිමියන් සහ කරදියනාරු පොලිස් ස්ථානාධිපති පොලිස් පරීක්ෂක තුෂාර හේමචන්ද්‍ර සමග ගැටුම ඇති විය.
සුමනරතන නාහිමියන් විශාල පරිශ්‍රමයක් යොදා දිවුලපතාන ගම්මානයට ගොස් එම පවුල්වලින් ඉල්ලා සිටියේ ගම්මානයෙන් ඉවත් නොවන ලෙසය,
දිවුලපතාන ගම්වාසීන් විසින් බුද්ධ මන්දිරයේ තැන්පත් කරන ලද බුද්ධ ප්‍රතිමාව ආරක්ෂක අංශයේ යම් නිලධාරීන් පිරිසක් පළාතේ දෙමල මන්ත්‍රීවරුන්ගේ උවමනාවට සහ රජයේ උවමනාවකට මෙයින් ඉවත් කර ඇති බවට තමා විශ්වාස පළ කරන බවද සුමනරතන හිමියෝ සඳහන් කළහ.
දිවුලපතාන ගම්මානයේ ගම්වාසීන් ශ්‍රි ලංකා මහවැලි අධිකාරිය මගින් බලහත්කාරයෙන් ඉවත් කිරීමට විරෝධය පළ කරමින් අම්පිටියේ සුමනරතන නාහිමියන් ප්‍රමුඛ මහා සංඝරත්නයත්, ප්‍රදේශවාසීන් අවස්ථා කිහිපයකදීම මහවැලි බී කලාපීය නේවාසික ව්‍යාපාර කළමනාකරණ කාර්යාලය වටලා විරෝධතාව සිදු කළහ.
නැගෙනහිර පළාතේ මඩකලපුව දිස්ත්‍රික්කයේ සිටින සිංහල පවුල් ප්‍රදේශයෙන් ඉවත් කිරීමට මඩකලපුව දිස්ත්‍රික් දෙමළ සන්ධාන පාර්ලිමේන්තු මන්ත්‍රී ශානක්කියන් රාසමාණික්‍යන් ඇතුළු මන්ත්‍රීවරුන් කිහිප කිහිපදෙනෙකු පාර්ලිමේන්තුවේ විශාල සටනක් සිදුකර තිබිණි. එහෙත් ඊට එරෙහිව කිසිදු සිංහල මන්ත්‍රීවරයෙකු ප්‍රකාශයක් නොකිරීම කණනගාටුවට කරුණක් බවද අම්පිටියේ සුමනරතන නාහිමියෝ සඳහන් කළහ.
නැගෙනහිර පළාතේ මඩකලපුව දිස්ත්‍රිකයේ සිංහල ජනතාවගේ ඉඩම් අයිතිවාසිකම් ඇතුළු අනෙකුත් අයිතිවාසිකම් රජය විසින් අමු අමුවේ උල්ලංඝනය කරන බවත්, මේ සඳහා පක්ෂ විපක්ෂ මන්ත්‍රීවරුන් පෙළගැසී සිංහල ජනතාවගේ අයිතිවාසිකම් ආරක්ෂා කරදීමට එක්වන ලෙසත් අම්පිටියේ සුමනරතන නාහිමියෝ මෙහිදී සඳහන් කළහ.
1 කරදියනාරු පොලිස් ස්ථානාධිපති තුෂාර හේමචන්ද්‍ර මහතා සමඟ සුමනරතන නාහිමියන් දිවුලපතාන ගමට යෑමට පොරබදන අයුරු
2 අම්පිටියේ සුමනරතන නාහිමියන් දිවුලපතාන ගම්වාසින් සමඟ මාධ්‍යයට අදහස් දැක්වූ අයුරු.
