ජයකාන්ත ලියනගේ – බළපිටිය
කොස්ගොඩ දූවේමෝදර ප්රදේශයේ අද (31) අළුයම සිදුකරන ලද වෙඩි තැබීමකින් තරුණයෙකු මියගොස් තිබෙන බව කොස්ගොඩ පොලීසිය කියයි.
මෙසේ මියගොස් ඇත්තේ තොස්ගොඩ දූවේමෝදර කැස්බෑ සංරක්ෂණ පර්යේෂණ මධ්යස්ථානයක් පවත්වාගෙන යනු ලබන අයෙකුගේ 23 හැවිරිදි පුත්රයා බවට පොලිස් පරීක්ෂණ වලදි තහවුරු වි තිබේ. මියගිය අය අරුත් මෙන්ඩිස් (23) නැමැති අයෙකු බවට පොලීසිය හදුනාගෙන තිබේ.
අද (31) අළුයම 5.15 ට පමණ යතුරු පැදියකින් පැමිණි නාදුනන තරුණයින් දෙදෙනෙක් විසින් ටි – 56 ගිනි අවියකින් මෙම වෙඩි තැබීම සිදුකර තිබෙන බවත් මියගිය තරුණයා නිවසේ සිටියදී නිවසටම පැමිණ මෙම වෙඩි තැබීම සිදුකර තිබෙන බවත් පොලිස් පරීක්ෂණ වලදි තහවුරු වූයේ යැයි කොස්ගොඩ පොලීසිය කියයි.
මියගිය තරුණයා සංචාරක මග පෙන්වන්නෙකු ලෙස කටයුතු කරමින් සිට ඇති බවද පොලිස් පරීක්ෂණ වලදී තහවුරු වී තිබේ. ඔහු සිය පියාගේ කැස්බෑ පර්යේෂණ මධ්යස්ථානයට සංචාරකයින් රැගෙන ඒම සිදුකර තිබෙන බවත් එහිදී ඇති වූ ගැටුමක් මෙම ඝාතනය සදහා මූලික වන්නට ඇතැයි විශ්වාස කරන බවත් පොලීසිය කියයි.
මියගිය අයගේ මෘත ශරීරය සිද්ධිය වූ ස්ථානයේ පොලිස් ආරක්ෂාව යටතේ තිබෙන බළපිටිය මහේස්ත්රාත්වරයා විසින් මහේස්ත්රාත් පරීක්ෂණය සිදු කිරීමෙන් අනතුරුව මෘත දේහය පශ්චාත් මරණ පරීක්ෂණය සඳහා බළපිටිය මූලික රෝහල වෙත රැගෙන යෑමට නියමිතව ඇති අතර කොස්ගොඩ පොලිසිය වැඩිදුර විමර්ශන සිදු කරනු ලබයි.
