-
කුඩා හා මධ්ය පරිමාණ මෝල් හිමියන් අත්හැර දමා ගහන්න හදන ගේමක් දූෂණයක් වෙන්නට පෙර හොයන්න… හර්ෂ පාර්ලිමේන්තුවේ දී හෙළි කරයි….
වී අලෙවි මණ්ඩලයේ වී තොග සහල් කිරීම සඳහා තෝරා ගත් මහා පරිමාණ වී මෝල් හිමියන් කීප දෙනෙක් වෙත ලබා දී එම ව්යාපෘතියෙන් කුඩා හා මධ්යම පරිමාණ සහල් මෝල් හිමියන් ඉවත් කිරීමත්, ගබඩා කර තිබූ වී තොගවල සහල් ප්රමාණයෙන් රජයට ලැබිය යුතු ප්රමාණයට වඩා සියයට 3කට ආසන්න ප්රමාණයක් අඩුවෙන් ලැබෙන ආකාරයේ තක්සේරුවක් කර රජයට පාඩු සිදුකිරීමත් සම්බන්ධව අද (26)ආචාර්ය හර්ෂ ද සිල්වා පාර්ලිමේන්තුවේ දී ප්රශ්න කළේය.
මන්ත්රීවරයා ප්රකාශ කළේ අදාල ව්යාපෘතිය වෙනුවෙන් ඉදිරිපත් කර ඇති කොන්දේසි හරහා කුඩා හා මධ්ය පරිමාණ සහල් මෝල් හිමියන් සම්පූර්ණයෙන් ඉවත් කිරීම මේ රජයේ ප්රකාශිත ප්රතිපත්තියට පටහැනි වෙනස් බවය.
එමෙන්ම මන්ත්රීවරයා පැවසුවේ උතුරෙන් සහ දකුණෙන් වී අලෙවි මණ්ඩලය රැස් කරගත් වී තොගවලින් අනිවාර්යයෙන් සියයට 65ක වී අස්වැන්නක් ලබා ගත හැකි බව ශක්ති සහල් ව්යාපාරය නිර්මාතෘවරයා ලෙස තමන් දන්නා බවය. එසේ තිබිය දි එම සහල් ප්රමාණය සියයට 63ක් දක්වා අඩු කළේ ඒ ලාභය තමන් තෝරා ගත් මහා පරිමාණ සහල් මෝල් හිමියන් වෙත ලබා දීමට දැයි මන්ත්රීවරයා ප්රශ්න කළේය.
ඔහු කීවේ දූෂණයක් වීමට පෙර මේ සම්බන්ධව සොයා ගැනීම රජයේ වගකීම බවය.
මන්ත්රීවරයා මෙසේ ද පැවසුවේය.
” වී අලෙවි මණ්ඩලය විසින් ලබා ගත් වී කොටන්නට කොටපු හාල් ලංකා සතොස හරහා විකුණන්න ටෙන්ඩර් එකක් කතා කරලා තියනවා.”
” මේ අද වෙනකොට සිද්ධ වෙන දෙයක් . මම ඊයේ පෙන්වා දුන්නා මෙම ටෙන්ඩර් එක සකස් කරලා තියෙන්නේ කුඩා හා මධ්ය පරිමාණ හාල් මෝල් හිමියන්ව අයින් කරලා තෝරා ගත්තු යම් කණ්ඩායමකට මේ ටෙන්ඩරය ලබා දෙන්න කියලා.”
“ඒකට සාක්ෂි හැටියට මම පෙන්වා දුන්නා කොයි විදිහට ද මේ ටෙන්ඩරය කොන්දේසි ඉදිරිපත් කරලා තියෙන්නේ කියන එක. අද වෙනකොට ඒ තත්ත්වය ඊටත් වඩා භයනාක තැනකට ගිහින් තියනවා. මොකද වී අලෙවි මණඩලයේ සාමාන්යාධිකාරී සමන් පාලිත, හෙක්ටර් කොබ්බෑකඩුව පර්යේෂණ ආයතනයේ දුමින්ද ප්රියදර්ශන, පසු අස්වනු තාක්ෂණය පිළිබඳ ආයතනයේ ඉංජිනේරු රත්නායක ලංසු ඉදිරිපත් කරපු කණ්ඩායම් මුණ ගැහිලා තියනවා. ”
“ඔවුන්ට කියලා තියනවා … කොන්දේසි තවත් තද වෙලා තියනවා. පැයකට වී කිලෝ 15000ක් අඹරන්න පුලුවන් ආයතනවලට විතරයි මේ ටෙන්ඩරයට ඉදිරිපත් වෙන්න පුලුවන්. ඊයේ කියපු කතාවලටත් එහා ගිහින්.”
“මම මේ ගැන කතා කරන්නේ අපි ශක්ති සහල් ව්යාපාරය හරහා මේ රටේ කුඩා හා මධ්යම පරිමාන සහල් මෝල් හිමියන් 300කට අධික ප්රමාණයක් එකට එකතු කරලා සමූපකාරයක් හදලා අපි එදා රුපියල් 85ට සහල් විකුණන්න මූලික වෙච්චි මනුස්සයා හැටියට. මම කොළඹ හිටියට මට මේ ගැන සෑහෙන අවබෝධයක් තියනවා. ඒ අය එක්ක කතා කරලා තියන නිසා.”
“උතුරෙනුයි දකුණෙනුයි ගත්ත නාඩු වී දැන් ගබඩා කරලා තියනවා. මේකෙන් අනිවාර්යයෙන් සියයට 65ක් හාල් ගන්න පුලුවන්. හැබැයි කොන්දේසිය දාලා තියෙන්නේ සියයට 63ක් හාල් ගන්න ඕන කියලා. කොහොමද එහෙම වෙන්නේ. ”
“අනිත් එක පැයකට 15000ක් අඹරන්නත්, ඒ අඹරන හාල්වලින් රජයට ලබා ගත යුතු ප්රමාණයට වඩා අඩු ප්රමාණයක් ලබා ගන්නත් වගේ කොන්දේසි දැම්මෙ කවුද. ”
“ඒ නිසා ඒක දූෂණයක් වෙන්න කලින් මේ ගරු සභාවට ඉදිරිපත් කරනවා අද මේ සාකච්ඡාවට භාජනය වන කාරණා අතරේ.”
