නිදහස් ලංකාවේ ප්රථම අග්රාමාත්යවරයා වූ ඩී.එස්.සේනානයකයන්ගේ මුණුපුරෙක් මෙන්ම එක්සත් ජාතික පක්ෂයේ හිටපු ජ්යෙෂ්ඨ නායකයෙක් ලෙස මහත්මා දේශපාලනයක නියැලුන රුක්මන් සේනානයක අභාවප්රාප්ත වී ඇත.
වර්ෂ 1948 ජූනි මස 21 වැනි දින උපත ලැබූ රුක්මන් සේනානායකයන් අද දිවි සැරිය නිමා කරන විට 76 වැනි වියෙහි පසු වූයේය.
රුක්මන් සේනානයකයන් දේශපාලනයට පිවිසෙන්නේ 1974 වසිරේ දී ය. එවිට ඔහු 24 හැවිරිදි තරුණයෙකි. සිය මාමා වූ ඩඩ්ලි සේනානායකගේ අභාවයෙන් පසුව දැදිගම ආසනය නියෝජනය කරමින් එක්සත් ජාතික පක්ෂයෙන් 1973 දී ප්රථම වරට ඔහු ශ්රී ලංකා පාර්ලිමේන්තුවට පිවිසියේය. 1977 දක්වා පාර්ලිමේන්තු මන්ත්රීවරයෙක් ලෙස කටයුතු කළ නමුත් රුක්මන් 1977 මහ මැතිවරණයට ඉදිරිපත් වූයේ නැත.
යළි 1994 දී ඔහු එක්සත් ජාතික පක්ෂයෙන් දෙවැනි වරටත් පාර්ලිමේන්තුවට පිවිසියේය. එතැන් සිට 2001 දක්වා පොළොන්නරුව දිස්ත්රික්කය නියෝජනය කරමින් පාර්ලිමේන්තු මන්ත්රීවරයා ලෙස හෙතෙම කටයුතු කළේය. නැවතත් 2001 වසරේදී කෑගල්ල දිස්ත්රික්කයෙන් පාර්ලිමේන්තුවට පිවිසි රුක්මන් එක්සත් ජාතික පක්ෂ ආණ්ඩුවේ පරිසර හා ස්වභාවික සම්පත් කැබිනට් අමාත්යවරයා ලෙස පත් විය. හෙතෙම 2004 වසර දක්වා කැබිනට් අමාත්ය ධූරය දැරූ අතර 2004 මහ මැතිවරණයෙන් ඔහු නැවත පාර්ලිමේන්තුවට පිවිසියේය.
2007 දී එක්සත් ජාතික පක්ෂයේ සභාපතිවරයා ලෙසත් 2008 දී උප නායක ලෙසත් රුක්මන් සේනානයකයන් කටයුතු කළේය.
