කීර්ති ප්රනාන්දු –
ඉතාලියේ රෝම අගනුවර මාර්ගයක දී ශ්රී ලාංකික අඹුසැමි යුවලක් අතර ඇතිවූ බහින්බස් වීමක් හේතුවෙන් සැමියා විසින් තියුණු ආයුදධයකින් ඇණ බිරියව මරා දමා ඇතැයි වාර්තා වේ.
මියගොස් ඇති කාන්තාව 40 හැවිරිදි වියේ පසුවන බවත් ඇය රෝම නගරයේ රැකියාවක නිරත බවත් එම වාර්තා සඳහන් කරයි.
මියගිය බිරිය හා සැමියා අතර මීට දින කීපයකට පෙර ඇති වූ පවුල් ආරවුලක් හේතුවෙන් බිරිය සැමියා අත්හැර වෙනත් ස්ථානයක නැවතී රැකියාවට යමින් සිට ඇත. ඊයේ දින සිය බිරිය රෝම නගරයේ බස් නැවතුම්පලක සිටිනු දැක ඇති ඇයගේ සැමියා ඇය අසලට පැමිණ ඔහු සමග ආපසු නිවසට එන ලෙස ඉල්ලා ඇත.
බිරිය එය ප්රතික්ෂේප කිරීම නිසා කෝපයට පත් සැමියා ඉනේ සඟවාගෙන තිබූ තියුණු ආයුදයක් රැගෙන ඉන් ඇයට ඇණ තිබේ.
බරපතල තුවාල ලත් කාන්තාව නගරයේ ආරක්ෂක නිලධාරීන් විසින් ගිලන් රථයකින් රෝම් සංකමිල්ල රෝහලට ඇතුළත් කර තිබේ. එහිදී ඇය මියගොස් ඇති බව රෝම පොලිසිය මගින් ශ්රී ලංකා තානාපති කාර්යාලයට දැනුම් දී ඇත.
සිද්ධියට සම්බන්ධ සැකකාර සැමියා එරට පොලිසිය මගින් අත්අඩංගුවට ගෙන තිබේ. ඔහු 49 හැවිරිදි වියේ පසුවන්නෙකි.
