මතුගම ප්රාදේශීය සභාවේ ලේකම්වරියට පහරදීම සහ ඇයගේ රාජකාරියට බාධා කිරීම සම්බන්ධයෙන් චෝදනා ලැබූ එම සභාවේ සභාපති කසුන් මුණසිංහ ලේකම්වරිය වෙත අද දිනයේත් සිදුකළ බලපෑම් හේතුවෙන් අත් අඩංගුවට ගෙන රක්ෂිත බන්ධනාගාරගත කර තිබේ.
අද දිනයේදීත් ලේකම්වරියට සභාපතිවරයා කළ බලපෑම වීඩියෝ සාක්ෂි ද සහිතව පොලිසියට පැමිණිලි කිරීමට ලේකම්වරිය කටයුතු කළා සැකකරු ලබන 08 වැනිදා දක්වා රක්ෂිත බන්ධනාගාරගත කිරීමට නියෝග කළේය.
සිද්ධිය සම්බන්ධයෙන් වැඩිදුර වාර්තාවක් එදිනට ඉදිරිපත් කරන ලෙස පොලිසියට දැනුම් දුන්නේය.
රුපියල් කෝටි දෙදහසකට ආසන්න සංවර්ධන ව්යාපෘතියක් සම්බන්ධව ඇති වූ බහින්බස් වීමක් අවසානයේ දී පසුගිය 30 වැනිදා මතුගම ප්රාදේශීය සභාවේ සභාපති සභා ලේකම්වරිය වෙත පහර දී තිබිණි.
මේසය මත තිබූ ලිපි ගොනු බර රඳවනයකින් කළ පහරදීමෙන් එම රඳවනය ලේකම්වරියගේ උරහිස ප්රදේශයට වැදීම නිසා ඇය රෝහල්ගත වුන අතර සිද්ධිය සම්බන්ධව ඇය පොලිසියේ පැමිණිල්ලක් ද ගොනු කළාය.
ඒ අවස්ථාවේ සිට මතුගම ප්රාදේශීය සභා සභාපති කසුන් මුණසිංහ ආගිය අතක් සොයා ගත නොහැකි විය. මතුගම පොලිසිය භාර ජ්යෙෂ්ඨ පොලිස් නිලධාරියෙක් මාධ්යයට පවසා සිටියේ 30 වැනිදා රාත්රියේ දී පොලිස් කණ්ඩායමක් සභාපතිවරයාගේ නිවස පරීක්ෂා කළ බවය.
එම අවස්ථාවේ දී ඔහු නිවසේ සිට නැත. ඉන් අනතුරුව 31 වැනිදා උදෑසනත් විශේෂ පොලිස් කණ්ඩායමක් මතුගම ප්රාදේශීය සභාවේ සභාපතිවරයා සොයා මතුගම ප්රදේශයේ මෙහෙයුම් ආරම්භ කර ඇති බව පොලිසිය ප්රකාශ කළේය. අනතුරුව ඔහු මතුගම පාර්ලිමේන්තු මන්ත්රී ජගත් විතාන ඇතුළු පිරිවර කණ්ඩායමක් සමග පැමිණ පොලිසියට භාර වූයේය.
අනතුරුව අත් අඩංගුවට ගෙන අධිකරණයට ඉදිරිපත් කළ සභාපතිවරයා ඇප මත නිදහස් කිරීමට අධිකරණය නියෝග කළේය. ඇප මත නිදහස්ව පැමිණි මතුගම ප්රාදේශීය සභා සභාපති නැවත වරක් අද දිනයේ දී ලේකම්වරියට ප්රසිද්ධියේ බැණ වදිමින් ඇයගේ සේවයට බාධා කරන ආකාරය වීඩියෝ පටවල පටිගත වී තිබිණි.
මේ සිදුවීම සමග යළිත් අත් අඩංගුවට පත්වන මතුගම ප්රාදේශීය සභා සභාපතිවරයා මේ වනවිට රක්ෂිත බන්ධනාගාරගත කර ඇත.
