ආයුර්වේද සංස්ථාවේ පුරප්පාඩුව පැවතුන තනතුරු කිහිපයක් සඳහා සම්මුඛ පරීක්ෂණ පවත්වා බඳවා ගැනීම් සිදුකරන්නට සූදානම් වන්නේ අගතිගාමී ආකාරයෙන් බවත් එම දූෂිත ප්රවේශයට වගකිව යුතු වන්නේ පැලවත්තේ නම විකුණමින් සියලු අගතීන් යටපත් කරගෙන ඉන්නා ආයුර්වේද සංස්ථාවේ සභාපතිනිය බැවින් මෙම බඳවා ගැනීමේ ක්රියාවලිය පිලිබඳ විධිමත් විමර්ශනයක් ලබා දෙන ලෙස ආයුර්වේද සංස්ථාවේ සේවක පිරිසක් සෞඛ්ය අමාත්යාංශයේ ප්රධාන අභ්යන්තර විගණකවරයා වෙත ලිපියක් යොමු කර ඉල්ලීමක් කර තිබේ.
ඔවුන් පවසන්නේ 2025 ඔක්තෝම්බර් මස අවසානයේ මෙම සම්මුඛ පරික්ෂණය පවත්වන්නේ අයදුම්පත් කැඳවීමේ සිට සම්මුඛ පරීක්ෂණ ක්රියාත්මක කිරීම දක්වා වූ සමස්ථ ක්රියාවලිය තුළම සිද්ධවන සංස්ථාවේ සභාපතිනියගේ ජුගුප්සාජනක මැදිහත්වීම මත බවය .
සභාපතිනිය විසින් සංස්ථාවේ තැපැල් සහයකට ලබා දී ඇති උපදෙස් අනුව ඔහු තැපෑලෙන් ලැබෙන අයදුම්පත් සියල්ල එකවර ගොනුවල සටහන් නොකරන බවත්, අනතුරුව ඇයගේ උපදෙස් මත අයදුම්පත් විවෘත කරවා සුදුසුකම් සම්පූර්ණ කර ඇති ඇතැම් අයදුම්පත් ඉවත් කර තමන්ට අවශ්ය අයදුම්කරුවන් පමණක් සම්මුඛ පරීක්ෂණ සඳහා කැඳවා ඇති බව එම සේවකයෝ අමාත්යාංශය වෙත දන්වති.
පරිපාලන නිළධාරී, සහකාර සාමාන්යාධිකාරී (මූල්ය) ඇතුළු බොහෝමයක් තනතුරු සඳහා මෙම ක්රියාව සිදු කර ඇතැයි කියන සේවකයින් එම අයදුම්පත් සංස්ථාවට ලැබුණු බවට ඇති සියළු සාක්ෂි මකාදමමින් පවතින බව ද චෝදනා කර ඇත.
මේ වන විට සුදුසකම් නොමැතිව සංස්ථාවේ පරිපාලන නිළධාරී වැඩබැලීමට පත් කර ඇති පුද්ගලයා සම්මුඛ පරීක්ෂණයට කැඳවා ඇත්තේ සභාපතිනියගේ දැඩි ඉල්ලීම මත බව ඔවුහු පෙන්වා දෙති.
බඳවාගැනීමේ පටිපාටිය අනුව නියමිත සුදුසුකම් සම්පූර්ණ කර නැති මෙම පුද්ගලයා 02 වන ස්ථානයට තෝරා පත් කර ඇත්තේ සභාපතිනියගේ බලය අනිසි ලෙස යොදා ගනිමින් බව සේවක පිරිස් අවධාරණය කර ඇත. මෙම තැනැත්තා පරිපාලන නිලධාරී ලෙස පත් කරගැනීමට ඔහු වැඩියෙන් ලකුණු ලබාගෙන තනතුර සඳහා සුදුසුකම් ලද පුද්ගලයා වැළැක්වීමේ වැඩපිළිවෙළක් ද රහසිගතව දියත් වී ඇති බව මෙම සේවක පිරිස් වැඩිදුරටත් අමාත්යාංශය වෙත දන්වා තිබේ.
සභාපතිනිය ඇතුළු කණ්ඩායම සංස්ථාවේ නීති උල්ලංඝනය කරමින් සිටින්නේ පැලවත්තේ නම විකුණමින් වීම රජය මේ වනවිට අත් විඳින ඛේදවාචකය බවද සේවක පිරිස් අමාත්යාංශයට යැවූ ලිපියේ දැක්වේ.
ගිණුම් නිළධාරී තනතුර සඳහා පවත්වන ලද සම්මුඛ පරීක්ෂණයේදීද වැඩිම සුදුසුකම් ඇති අයදුම්කරුවන් සඳහා සැලසුම් සහගතව අඩු ළකුණු ලබාදී බරපතල මූල්ය වංචා සම්බන්ධ චෝදනා ලැබ ඇති සංස්ථාවේ පොත්තබන්නා ලෙස සේවය කරන ආයුර්වේද සංස්ථා සේවක සංගමයේ සභාපතිට සම්මුඛ පරීක්ෂණයේ දී දක්වන ලද කුසලතා මත පදනම්ව යැයි කියමින් ගිණුම් නිළධාරී තනතුර සඳහා වැඩිම ළකුණු ලබා දී පත් කර ගැනීම මේ වනවිට සංස්ථාව තුළ දැඩි කතා බහට ලක් වී ඇතැයි එම සේවකයෝ දන්වා සිටිති.
ගිණුම් නිළධාරී සහ පරිපාලන නිළධාරී තනතුරු සඳහා සම්මුඛ පරීක්ෂණ පැවැත්වීමේදී දූෂණ හා අක්රමිකතා සිදුවූ බවට අභ්යන්තර අයදුම්කරුවන් කිහිපදෙනෙකු විසින් පැමිණිලි ඉදිරිපත් ඇති බවත්, සභාපතිනිය සිය අත්තනෝමතික හැසිරීම ප්රකට කරන්නේ සිය දේශපාලන බලය සහ පැලවත්තේ සම්බන්ධතා පිළිබඳ ඉඟි කරමින් වීම රජයට කරන බරපතල හානියක් බවත් එම සේවකයෝ කියති.
මේ ක්රියාවලිය සඳහා විධිමත් විමර්ශනයක් පවත්වන ලෙස ඔවුහු අමාත්යාංශයෙන් ඉල්ලා සිටිති.
