මනම්පිටිය නිමල් ජයරත්න –
-
අසල ක්රීඩාංගනයේ ක්රීඩා කිරීමට එන දරුවනට කසිප්පු විකුණලා… පිට පළාත්වලට කසිප්පු ප්රවාහනය කරන්න ජාවාරමට සම්බන්ධ දරුවන් දෙදෙනා යොදාගෙන…
පොළොන්නරුව වැලිකන්ද අසේලපුර මහා විද්යාලයේ මෙවර සාමාන්ය පෙළ විභාගයට පෙනී සිටින සිසුන් දෙදෙනෙකු සම්බන්ධ කර ගනිමින් අසේලපුර ප්රදේශයේ මුළුතැන් ගෙයක කාලයක් තිස්සේ, ගෑස් ලිප් සහ සිලින්ඩර් භාවිතයෙන් නිෂ්පාදනය කර පවත්වාගෙන ගිය නීති විරෝධී මත්පැන් ජාවාරමක් වටලා ප්රධාන ජාවාරම්කරු, සිසුන් දෙදෙනා, පෙරීමට යොදාගත් උපකරණ, නීති විරෝධී අරක්කු තොගයක් ඊයේ ( 09 ) රාත්රියේදී අත්අඩංගුවට ගත් බව වැලිකන්ද පොලිසිය කියයි.
සැකකරුවන් සතුව තිබු අරක්කු ලීටර් හතළිහක්, පෙරීමට යොදාගත් දඟර එකක්, ගෑස් ලිපක්, සහ ගෑස් සිලින්ඩරයක්, මුළුතැන් ගේ පිටුපස පොළොව යට සඟවා තිබූ බැරල්, ගෝඩා පිරවූ ප්ලාස්ටික් බුලි කීපයක්, මෙහිදී අත්අඩංගුවට ගැනීමට හැකියාව ලැබුණු බව ඒ පිළිබඳ පරීක්ෂණ සිදුකරන වැලිකන්ද පොලිසිය සඳහන් කරයි.
අත්අඩංගුවට ගත් ප්රධාන සැකකරු අවුරුදු විසිහතර වයසේ පසුවන අතර බාල වයස්කාර සැකකාර සිසුන් දෙදෙනා අවුරුදු 15 වයසේ පසුවන්නන් බව පොලිසිය පවසයි.
ප්රධාන සැකකරු, කළුතර, මාපලගම සිට මාස දෙකකට ඉහතදී පැමිණ මෙම ඉඩම රුපියල් ලක්ෂ හතක මුදලට ගෙන පාසල් දරුවන් දෙදෙනා සම්බන්ධ කරගෙන මුළුතැන්ගෙය තුළ ඉතා සූක්ෂමව මෙම නීති විරෝධී මත්පැන් නිෂ්පාදනාගාරය පවත්වාගෙන ගොස් ඇති බවට මූලික පරීක්ෂණවලින් තහවුරු වී ඇති බව ඒ පිළිබඳ සම්බන්ධ පරීක්ෂණ සිදුකරන වැලිකන්ද පොලිස් ස්ථානාධිපති ප්රධාන පොලිස් පරීක්ෂක සමන්ත රත්නායක අප කළ විමසීමකදී පැවසීය.
නිවස අසල ක්රීඩාංගනයේ සෙල්ලම් කිරීමට පැමිණෙන පාසල් දරුවන්ට නිෂ්පාදනය කරන නීති විරෝධී අරක්කු, අලෙවි කිරීමේ අරමුණින් සහ වෙනත් ප්රදේශවලට අරක්කු ප්රවාහනය කිරීම සඳහා මෙම සිසුන් දෙදෙනා ජාවාරමට සම්බන්ධ කරගෙන ඇති බවට තොරතුරු තහවුරු ඇති බවද පොලිසිය කියයි.
සැකකරුවන් ඇප මත නිදහස් කර එළඹෙන 16 වෙනිදා පොළොන්නරුව මහේස්ත්රාත් අධිකරණයට ඉදිරිපත් කිරීමට කටයුතු කර ඇති බවද පොලිසිය සඳහන් කරයි.
පොළොන්නරුව ජ්යෙෂ්ඨ පොලිස් අධිකාරි නිශාන් ද සිල්වා මහතාගේ උපදෙස් මත, වැලිකන්ද ප්රදේශය භාර සහකාර පොලිස් අධිකාරී එම්.එස්.එම්.ජරූල්ගේ මෙහෙයවීමෙන් වැලිකන්ද පොලිස් ස්ථානාධිපති, ප්රධාන පොලිස් පරීක්ෂක සමන්ත රත්නායකගේ උපදෙස් මත, වැලිකන්ද දූෂණ මර්දන ඒකකයේ ස්ථානාධිපති උප පොලිස් පරීක්ෂක ඩබ්ලිව්.ජී.ටී.කේ.වීරසිංහ, පොලිස් සැරයන් 67334 ෆ්රෙන්සිස්, පොලිස් කොස්තාපල් 89157 නිශාන්ත, පොලිස් කොස්තාපල් 102737 රණසිංහ, යන පොලිස් නිලධාරීහු මෙම වැටලීම සිදුකළහ.
