දිනසේන රතුගමගේ –
අවුුරුදු 11ක් වීසා රහිතව හොරෙන් ඉන්දියාවේ රැඳී සිටි මුලතිව් ප්රදේශයේ කාන්තාවක් ධීවර බෝට්ටුවකින් ඉන්දියාවේ සිට ශ්රී ලංකාවට පැමිණීමට උත්සාහ කරද්දී රාමේස්වරන් පොලිසිය විසින් අත් අඩංගුවට ගෙන තිබේ.
2013 වසරේ මාස 06ක වෛද්ය වීසා මත ඉන්දියාවට පැමිණ ඇති මෙම කාන්තාව ඉන්දියාවේ පදිංචිව සිටින මුලතිව් ප්රදේශයේම පවුලක් ලඟ නැවතී ඇඳුම් මැසමින් රැකියාවක් කර ඇති අතර යළි ලංකාවට එන්නට අවශ්ය වූ විට ධීවර බෝට්ටුවකට රුපියල් පනස් දහසක් ගෙවා ලංකාවට එන ගමන සූදානම් කරගෙන ඇත.
එම ගමන සූදානම් කරගැනීමෙන් අනතුරුව මුහුදු වෙරළට පැමිණි ඇයගේ හැසිරීම සැකකටයුතු බැවින් ඇයව ප්රශ්න කරන විට තමන් ශ්රී ලාංකික කාන්තාවක් බව දන්වා සිටි නිසා ඇයව පොලිස් භාරයට ගෙන කල ප්රශ්න කිරීම්වල දී ඉහත කතාව හෙළි වී තිබේ.
රුපියල් පනස් දහසක් ගෙවා ඇති ධීවර බෝට්ටුව රාත්රී 7වනවිට තමන් ගැනීමට වෙරළ තීරයට එන බවට ඇය කළ හෙළිදරව්ව නිසා පොලිසිය රැක සිට බෝට්ටුවත් එහි සිටි බෝට්ටු කරුවන් දෙදෙනෙකුත් අත් අඩංගුවට ගෙන තිබේ.
මුලතිව් කාන්තාවගෙන් මෙම ගමන සදහා මුදල් ලබාගත් මිනිස් ජාවාරම්කරුවා අත් අඩංගුවට ගැනීමට පොලීසිය පියවර ගනිමින් සිටියි.
කාන්තාව සම්බන්ධයෙන් හා නවාතැන් දුන් පිරිස සම්බන්ධයෙන් ද පරීක්ෂණ පවත්වා ගෙන යයි.
