තම අමාත්යාංශයේ තමන්ට මුහුණ දීමට සිදුවී ඇති ප්රශ්න සහ ගැටලු සම්බන්ධව ලිඛිත වාර්තාවක් ජනාධිපතිවරයාට බාරදුන් බව ග්රාමීය මාර්ග සහ අවශේෂ යටිතල පහසුකම් රාජ්ය අමාත්ය නිමල් ලන්සා පාර්ලිමේන්තුවේදී අද (23) පැවසීය.
රටේ පවතින තත්වය ගැන සභාව කල් තබන අවස්ථා විවාදයේ දී කරුණු දක්වමින් ජනාධිපතිවරයා තමාගේ පැමිණිල්ල ගැන සාධාරණ පරීක්ෂණයක් පවත්වනු ඇතැයි බලාපොරොත්තු වන රාජ්ය ඇමතිවරයා කීවේය.
තමාගේ ප්රශ්නය විසඳිය හැක්කේ ජනාධිපතිවරයාට පමණක් බැවින් එම වාර්තාවේ කරුණු තමා මේ සභාවේ පැවසීමට බලාපොරොත්තු නොවන බවද ඔහු පැවසුවේය.
“මට යම් යම් ප්රශ්න ඇතිවෙලා තියෙනවා. මේවා මගේ විතරක් නොවෙයි රටේත් ප්රශ්න. සමහර වැල් ගහ වටා එතෙනවා.“
“නමුත් සමහර වැල් ගහ ආරක්ෂා කරන්නේ නැහැ. ගහ විනාශ කරනවා. මට පහුගිය ටිකේ නින්දා අපහාස කරපු අපේ පැත්තෙ ඉන්න අයට මම කියන්නේ එක දෙයයි. “
“මටත් ප්රහාරය එල්ල කරන්න පුළුවන්. නමුත් මම ඒ තත්වයට යන්නේ නැහැ. මොකද ජනතාව කිව්වා මට එහෙම කරන්න එපා කියලා. මම ඒ අයට ප්රති ප්රහර එල්ල කළොත් මීට වඩා තත්වය දරුණු වේවි.“
රාජ්ය ඇමතිවරයා රටේ ප්රශ්නය ගැන විවාදයට එක් වෙමින් මෙසේ පැවසුවේය.
අද රටක් විදියට අපි ඉන්නේ විශාල ආර්ථික ප්රශ්නයක. මේ තත්වය ඇති වුණේ කොවිඩ් වසංගතය නිසායි.
අපි විපක්ෂයට දොස් කියලා විපක්ෂය අපිට දොස් කියලා මේ ප්රශ්නය විසඳෙන්නේ නැහැ. අද රටේ තියෙන්නෙ ඩොලර් ප්රශ්නයක්. අපි ඒක පිළිගන්න ඕන.
මේ තත්වය ඇතිවුණේ කොවිඩ් නිසයි. ආණ්ඩුව විපක්ෂය කවුරුත් එකතුවෙලා මේ ප්රශ්නයට විසඳුම් සෙවිය යුතුයි. අපේ පෞද්ගලික ප්රශ්න මෙතන කතා කතාකරල වැඩක් නෑ. ආර්ථික ප්රශ්නය ගැන මේ රජයට විතරක් ඇඟිල්ල දිගු කිරීම වැරදියි.
අපි මෙතනදී පක්ෂ පාට ජාති භේද අමතක කළ යුතුයි. හැම ආණ්ඩුවක්ම බලයට ආවම කරලා තියෙන්නේ කලින් ආණ්ඩුවට දොස් කියන එක. ආදායම් උපයන වැඩපිළිවෙළකට රට යා යුතුයි. එකිනෙකාට චෝදනා කරලා මේ ප්රශ්න විසඳන්න බැහැ.
අපි වාද භේද ප්රශ්න ඔක්කොම අමතක කරමු. සත්ය රටට කතා කරලා වැඩපිළිවෙළකට එමු.
රට වැටී ඇති තත්වයට මේ රට පාලනය කරපු සියලු දෙනා වගකිව යුතුයි. ආණ්ඩුව ශක්තිමත් නම් මිනිස්සු ශක්තිමත් වෙනවා. ඒ නිසා අප කළ යුත්තේ ආණ්ඩුව ශක්තිමත් කිරීමයි. මිනිස්සුන්ට නොයෙකුත් ඉල්ලීම් ඉදිරිපත් කරන්න පුළුවන්. නමුත් ඒවා සාධාරණ වෙන්න ඕන. ආණ්ඩුවකට සල්ලි ගස්වලින් කඩන්න බැහැ. ජනතාවගෙන් බදු ගන්න බැරි නම් රටකට සල්ලි කෝ.
ආර්ථිකය ගොඩනැගීම සඳහා යම් කතිකාවතක් ඇති කර ගැනීමට එක්වන්න කියලා සමගි ජන බලවේගය ට ජනතා විමුක්ති පෙරමුණට මම ආරාධනා කරනවා.
