මනම්පිටිය නිමල් ජයරත්න –
තම සොහොයුරා නිදහස් කරන ලෙසට ඉල්ලා හිඟුරක්ගොඩ පොලිස් ස්ථානය තුළදී පොලිස් නිලධාරීන්ට තර්ජනයක් කිරිමේ සිද්ධියක් සම්බන්ධයෙන් හිඟුරක්ගොඩ ප්රාදේශීය සභාවේ ජාතික ජන බලවේගයේ මන්ත්රීවරයෙකු ඊයේ ( 04 ) රාත්රියේදී අත්අඩංගුවට ගත් බව හිඟුරක්ගොඩ පොලිසිය පවසයි.
හිඟුරක්ගොඩ යටියල්පතාන ප්රදේශයේ පදිංචි, ජාතික ජන බලවේගයේ සභික, සමන් උදයකුමාර යන අය ඊයේ හිඟුරක්ගොඩ පොලිස් ස්ථානය තුළදී මෙලෙස අත්අඩංගුවට පත්ව ඇත.
විදුලි බිල් නොගෙවීම මත මන්ත්රීවරයාගේ සොහොයුරාගේ නිවසේ විදුලිය විසන්ධි කිරීමට ආ විදුලි බල මණ්ඩලයේ සේවකයින් දෙදෙනෙකුට තර්ජනය කර ඔවුන්ගේ රාජකාරියට බාධා කර නිලධාරීන් පැමිණි යතුරු පැදියට පහරදී අනර්ථයක් සිදු කිරීමේ චෝදනාවට මන්ත්රීවරයාගේ සොහොයුරා හිඟුරක්ගොඩ පොලිසිය මගින් අත්අඩංගුවට ගෙන තිබිණි.
විදුලි බල මණ්ඩලයේ සේවකයින් දෙදෙනා මේ සම්බන්ධයෙන් පොලිසියට කළ පැමිණිල්ලකට අනුව මෙම සැකකරු අත්අඩංගුවට ගත් බව හිඟුරක්ගොඩ පොලිසියේ සඳහන් කරයි.
අත්අඩංගුවට ගත් සිය සොයුරා බැලීමට මන්ත්රීවරයා ඊයේ පොලිසියට පැමිණ, සොයුරා නිදහස් කරන ලෙසට ඉල්ලා පොලිස් නිලධාරීන්ට තර්ජනය කර සාපරාධී බලහත්කාරයේ පෑමේ සිද්ධිය සම්බන්ධයෙන් මන්ත්රීවරයා අත්අඩංගුවට ගත් බවද පොලිසිය පවසයි.
සිය සහෝදරයා බැලීමට පොලිසියට ගිය සැකකාර මන්ත්රීවරයා රාජකාරියේ නියුතු පොලිස් නිලධාරීයකුගේ ජංගම දුරකතනය ද උදුරාගෙන ඇති බව පොලිසිය පවසයි.
අත්අඩංගුවේ සිටින සැකකරුවකු මුදවා ගැනීමට උත්සාහ කිරීමේ වරදට අත්අඩංගුවට ගත් ප්රාදේශීය සභා මන්ත්රීවරයා හිඟුරක්ගොඩ අධිකරණ වෛද්යවරයා වෙත ඉදිරිපත් කර ඇති අතර, එහිදී ඔහු මද්යසාර භාවිත කර ඇති බවට වාර්තාව ලැබුණු බව පොලිසිය සඳහන් කරයි.
අත්අඩංගුවට ගත් ප්රාදේශීය සභා මන්ත්රීවරයා හිඟුරක්ගොඩ මහේස්ත්රාත් අධිකරණයට 05 වෙනිදා ඉදිරිපත් කිරීමට නියමිත බවද පොලිසිය සඳහන් කරයි.
