සුමිත් පොතුපිටිය හෙරෝයින් මත්කුඩු වැටලීමකට ගිය පින්වත්ත පොලිසියේ සාජන් වරයෙකුගේ අතක් සපාකෑ කාන්තාවක හෙරෝයින් මත්කුඩුත් සමග අද අත්අඩංගුවට ගත්බව පින්වත්ත පොලිසිය පවසයි .
මෙසේ අත්අඩංගුවට ගෙන ඇත්තේ මහවිල, මාදුපිටිය මාර්ගයේ පදිංචි 25 හැවිරිදි කාන්තාවක බව පොලිසිය කියයි.
සැකකාර කාන්තාව ගේ ස්වාමී පුරුෂයා අයිස් මත්ද්‍රව්‍ය පැකට් තුනක් සමග පළමුව අත්අඩංගුවට ගෙන සිර මැදිරියේ රඳවා සිට ඇත. ඔහු බැලීමට ඔහුගේ හිතවතෙක් බත් පාර්සලයක් රැගෙන පැමිණි තිබේ.
පොලිසියට සැක සිතී බත් පාර්සලය පරීක්ෂා කිරීමේදී එහි තිබූ බල මාළු කෑලි දෙකක් අතරේ සගවා තිබූ අයිස් මත්ද්‍රව්‍ය කුඩා පැකට් පහක් සොයා ගෙන ඇත.
බත් පාර්සලය රැගෙන පැමිණි පුද්ගලයාගෙන් ඒ ගැන විමසීමේ දී ඔහු ප්‍රකාශ කර ඇත්තේ එය ලබාදී ඇත්තේ සැකකරුගේ බිරිය බවය.
ඉන් පසු පොලිස් කණ්ඩායම ඇය පදිංචි නිවස වෙත ගොස් ඇත.
එහිදී පළමුව කාන්තා කොස්තාපල්වරියන් ලවා ඇය පරීක්ෂා කිරීමේදී සැකකාරිය කාන්තා නිළධාරීනියන් සමග පොරබදා තිබේ.
එසැනින් සැකකාරිය අසල සිටී සාජන්වරයා ගේ අත සපාකා ඇති බවත්, පසුව දැඩි පරිශ්‍රමයක් යොදා සැකකාරියගේ තනපටය තුළ සඟවාගෙන සිටී හෙරෝයින් මත්කුඩු ග්‍රෑම් පහයි මිලිග්රැම් 300 ක් සොයාගැනීමට කාන්තා නිළධාරීනියන්ට හැකිවූ බවත් පොලිසිය සඳහන් කරයි.
සපාකෑමට ලක්වූ සැරයන් වරයා වෛද්‍ය වරයෙකු හමුවට පැමිණවීම සඳහා පානදුර මූලික රෝහලට යොමුකර ඇත.
සැකකරුවන් පානදුර මහේස්ත්‍රාත් අධිකරණයට ඉදිරිපත් කිරීමට නියමිතව තිබූණි .
ජේෂ්ඨ පොලිස් අධිකාරී සමන්ත වෙදගේ සහ සහකාර පොලිස් අධිකාරී කමල් ජයනෙත්තිගේ උපදෙස් පරිදි ස්ථානාධිපති (වැබ) පොලිස් පරීක්ෂක වී.ඩී.එස් ලලිත්ගේ මෙහෙයවීමෙන් සාජන් මේජර් ජයසිංහ, සැරයන් චන්ද්‍රරත්න (39077), කාන්තා කොස්තාපල් දිල්හාරා (12953) සහ අනුරාධා (1095) වැටලීමට එක්වූහ .
