පොලිසියේ කොවිඩ් නිරෝධායන නිරුවත හෙළි වෙයි…

නිරෝධායනයට ලක් වන පොලිස් නිලධාරීන්ට තම නිවෙස්වල හෝ පොලිස් ස්ථාන නිල නිවාස තුළ නිරෝධායනය කරනු වෙනුවට විශේෂිත නිරෝධායන මධ්‍යස්ථාන පිහිටවුව ද මෙම නිරෝධායන මධ්‍යස්ථානවල ප්‍රතිකාර සඳහා වූ කිසිම මූලික පහසුකම් නොමැතිවීමෙ  හේතුවෙන් තමන් දැඩි අපහසුතාවකට පත්ව සිටින බව එම පොලිස් නිලධාරීහු පවසති.

ලංකාසර වෙත ඇමතූ මෙම පොලිස් නිලධාරීන් ගණනාවක්ම පැවසුවේ ඔවුන්ට මූලික පහසුකම් වත් මෙම නිරෝධායන මධ්‍යස්ථානවල නොලැබෙන බවය. මෙම අවම පහසුකම් සමඟ දින 14ක් ගත කිරීම කොවිඩ් අවදානම මැද ඉහළ නිලධාරීන්ගේ නියෝගය මත රාජකාරී කිරීමට ලබා දුන් දඬුවමක් තත්ත්වයට පත්ව ඇති බවය. මේ පිළිබඳව පොලිස්පතිතුමා මෙන්ම කොවිඩ් මර්දනය භාර ඉහළ නිලධාරීන්ගේ අවධානය යොමු කරන ලෙස මෙම නිලධාරීහු අප වෙත කරුණු හෙලි කරමින් ඉල්ලා සිටියහ.

මේ වනවිට පිහිටුවා ඇති පොලිස් නිරෝධායන  මධ්‍යස්ථානවල තත්ත්වය පිළිබඳව ලංකාසර වෙත කරුණු හෙළි කළ නිලධාරියකු පවසන්නේ මෙම නිරෝධායන කඳවුරු    කොවිඩ් 19 වසංගතයෙන් ආරක්ෂා වීමට අනුගමනය කළ යුතු විධිමත් සෞඛ්‍යාරක්ෂණ පිළිවෙත් කිසිවක් කිසි වටෙකත්  අනුගමනය නොකෙරන බවය.

එවැනි ආරක්ෂණ ක්‍රමවේද අනුගමනය කිරීමට තරම් ඇතැම් මධ්‍යස්ථානවල පහසුකම් නැති බවය.  විශේෂයෙන් සනීපාරක්ෂක පහසුකම් බොහෝ ඒවායේ සීමා වී තිබේ. කුණ්ඩසාලේ පවතින එක් නිරෝධායන මධ්‍යස්ථානයක 40 දෙනකු රඳවා සිටියද ඔවුන් වෙනුවෙන් ඇත්තේ වැසිකිලි හතරක් බව ඔවුහු පවසති. එසේම අතැම් නිරෝධායන මධ්‍යස්ථානවල  එකම ශාලාවක රඳවා තබා ඇති අතර අඩුම ගණනේ ඇඳන් අතරවත් මීටරයක පරතරයක් නොපවතී. ජ්‍යෙෂ්ඨ පොලිස් පරීක්ෂකවරුන්, පොලිස් පරීක්ෂකවරුන්, උප පොලිස් පරීක්ෂකවරුන් ගේ සිට සියලුම නිලධාරීන් එකම මට්ටමකටම රඳවා ඇති අතර ජල පහසුකම් පවා නිසි ලෙස සැලසීමට හැකිව නැත.

කුණ්ඩසාලේ පිඑහිටි එක් පොලිස් නිරෝධායන මධ්‍යස්ථානයක මෑත ඉදිකළ ගොඩනැගිල්ලක් බැවින් එහි විදුලි පංකා දැමූ විට දුහුවිලි ඇවිස්සෙන අතර එම දුහුවිලි සහිත වාතය ආශ්වාස කිරීමෙන් නිකරුණේ ශ්වසන ආබාධ නිර්මාණය වන අවදානමක් පවතින බව එක් නිලධාරියෙක් අපට පැවසීය. එමෙන්ම ආහාර පාන ලබා දීමේදීද ඒ පිළිබඳව අවධානයක් දක්වා නොමැති බවත් එම ආහාර පානවල ගුණාත්මක තත්ත්වය පිළිබඳව ගැටලුවක් පවතින බවද ඔවුහු පෙන්වා දෙති.

මෙහිදී දී අප වෙත අදහස් පළ කළ එක් නිලධාරියකු පෙන්වා දෙන්නේ  අවශ්‍යනම්   නිරෝධායනය වන පොලිස් නිලධාරීන් පහසුකම් සහිතව රඳවා තැබීමේ ස්ථාන ගණනාවක්  පොලිසිය සතුව තිබියදී මෙවැනි ත්ත්තවයක් නිර්මාණය කර ඇති බවය.

“ පොලිස් අභ්‍යාස විද්‍යාලවල හොඳ කාමර පහසුකම් තිබෙනවා. අඩුම ගානේ දවසකට රුපියල් 1000ක් විතර අපෙන් අරන් හරි අපට ඒ වගේ තැනකත් ලබා දෙන්න කියල ඉල්ලන්නේ. මොකද මේ වගේ නැත්වල හිටියම අපි එක අතකින් ශාරීරිකවත් මානසිකවත් වැටෙනවා. හරියට අපි මේ රාජකාරී කළාට දෙන දඬුවමක් වගේ?“ යයි මෙහිදී අප වෙත අදහස් දැක්වූ එක් නිලධාරියෙක් සඳහන් කළේය.

මේ වනවිට නිරෝධායනයට ලක් වන නිලධාරීන් ප්‍රමාණය වැඩි වන පසුබිමක් තුළ පොලිසියට මෙවැනි අවම පහසුකම්වත් ලබා දෙන්නට නොහැකි නම් අඩුම තරමින් තමන් සේවය කරන පොලිස් ස්ථානවලම පවතින නේවාසිකාගාර මෙවැනි නිරෝධායන මධ්‍යස්ථාන ලෙස වෙන් කොට භාවිත කිරීමට සැලැස්විය හැකි බවත් නිවසේ සිට නිරොධායනයට ලක් වීමේ හැකියාව ඇති නිලධාරීන් එසේ නිවසේ සිට නිරෝධායනට ලක් කිරීම මෙම සංකීර්ණ තත්ත්වය සරල නිරීමට හැකියාවක් ලැබෙන බව ද මෙහිදී එක් නිලධාරියෙක් පෙන්වා  දුන්නේය.