කොළඹ ලෝක වෙළෙඳ මධ්යස්ථානය මූලික කරගෙන පවත්වාගෙන ගිය තිකෝ ව්යාපාර සමූහයේ කළමනාකාර අධ්යක්ෂිකා තිළිණි ප්රියමාලි විසින් සිදු කරන ලද බව කියන මූල්ය වංචාව සම්බන්ධයෙන් එම ව්යාපාරයේ ආයෝජනය කළ ආයෝජකයන් ගණනාවක් පැමිණිලි කිරීමට පැමිණෙන බවට වාර්තා වුවද ඔවුන් මේ පිළිබඳව රහස් පොලිසියේ පැමිණිලි කිරීම දිනෙන් දින කල් දමමින් සිටින බව විමර්ශන ආරංචි මාර්ග සඳහන් කරයි.
මේ තත්ත්වය මත ඇය සම්බන්ධයෙන් ගොනු වන චෝදනා දැනට ලැබී ඇති පැමිණිලි කිහිපය මත පමණක් ගොනු කිරීමට සිදුවනු ඇතැයි මෙම ආරංචි මාර්ග පෙන්වා දෙයි.
පොලිස් තොරතුරුවලට අනුව මෙතෙක් මේ සම්බන්ධයෙන් ලැබී ඇත්තේ පැමිණිලි අටක් වන අතර එම පැමිණිලි අනුව මෙම කාන්තාව විසින් අයථා ලෙස පරිහරණය කර ඇති මුදල රුපියල් මිලියන 2500කට ආසන්න වේ.
එසේ වුවද තවත් ප්රකට දේශපාලකයන් දෙදෙනකු, වෛද්යවරයකු ඇතුළු විවිධ ව්යාපාරවලට සම්බන්ධ ගණනාවක් ඇයගේ සමාගමෙහි ආයෝජනය කර ඇති බවට සඳහන් ව ඇතත් ඔවුන් අපරාධ පරීක්ෂණ දෙපාර්තමේන්තුවට පැමිණිලි කිරීම සහ ප්රකාශ ලබා දීම සඳහා පැමිණෙන බවට නිල නොව අකාරයෙන් දැනුම් දී තිබුණද මෙතෙක් ඔවුන් පැමිණ නැත.
එසේ නොපැමිණීමට බොහෝ විට හේතු වී ඇත්තේ අදාළ මුදල් උපයාගත් ආකාරය ඉදිරිපත් කිරීමට නොහැකි කළු සල්ලි මේ ව්යාපාරය තුළ ආයෝජනය කර ඇති නිසා බවට විමර්ශකයෝ විශ්වාස කරති.
කෙසේ වුවද මෙම ව්යාපාර ආයතන සතුව පවතින පරිගණක මේ වනවිට අපරාධ පරීක්ෂණ දෙපාර්තමේන්තුවේ පරිගණක විමර්ශන අංශය විසින් පරීක්ෂාවකට ලක්වන අතර එමගින් බොහෝ තෙරතුරු අනාවරණය වනු ඇතිය සඳහන් වේ.
