සමඟි ජන බලවේගය මගින් මහනුවර සිට කොළඹ දක්වා දියත් කර තිබෙන නිදහස් අරගලයේ පාගමන අද (26) මහනුවර ඔරලෝසුකණුව අභියසින් ආරම්භ විය.
විපක්ෂනායක සජිත් ප්රේමදාස ඇතුළු සමගි ජනබලවේගයේ මන්ත්රීවරු, ආසන සංවිධායකවරු ඇතුළු පක්ෂ ක්රියාකාරීන්ගේ සහභාගිත්වයෙන් පාගමන ආරම්භ කිරීමට ප්රථම මහ සංඝරත්නය සෙත්පිරිත් සජ්ජායනය කර ඊට ආශිර්වාද කරනු ලැබීය.
ශ්රී දළදා මාලිගාවට ගොස් දළදා සමිඳුන් වැඳ පුදා ආශිර්වාද ලබා ගැනීමෙන් පසු සජිත් ප්රේමදාස, ලක්ෂ්මන් කිරිඇල්ල, රංජිත් මද්දුමබණ්ඩාර, ගයන්ත කරුණාතිලක, ජේ.සී අලවතුවල, හර්ෂණ රාජකරුණා ඇතුළු පිරිස මහනුවර නාථ දේවාල පරිශ්රයේදී ආගමික වතාවත් වල නිරත වූහ.
එම අවස්ථාවට මල්වතු පාර්ශවයේ අනුනායක පූජ්ය නියංගොඩ විජිතසිරි, අස්ගිරි පාර්ශවයේ අනුනායක පුජ්ය වෙඬරුවේ උපාලි යන නාහිමිවරු ඇතුළු මහ සංඝරත්නය වැඩම කර පිරිත් සජ්ජායනය කළහ.
වත්මන් අර්බුදකාරී වාතාවරණය දුරු වී යහපත් ලෙස ජනතාවට ජීවත්වීමට පසුබිම උදාවිය යුතු බව සියලු දෙනාගේ අපේක්ෂාව බවත් විපත් අවස්ථාවල ධෛර්ය සම්පන්නව ඊට මුහුණ දී ජයගත යුතු බවත් නියංගොඩ විජිතසිරි නාහිමියෝ පැවසූහ.
මේ රටේ දේශපාලන නිදහස,ප්රජාතන්ත්රවාදී ප්රතිසංස්කරණ හා ජනතාව ජීවත්කරවීමේ ගමන ශක්තිමත් කිරීමේ අධිෂ්ඨාන පාගමන මහනුවරින් ආරම්භ කළ බවත් ජනමතයට සවන් දී ජනතා ඉල්ලීම් ක්රියාත්මක කරන්න ලෙස ආණ්ඩුවට දැනුම් දෙන බවත් මෙහිදී විපක්ෂනායක සජිත් ප්රේමදාස මහතා පැවසුවේය.
මහනුවරින් ආරම්භ කළ මාවනැල්ල නගරයෙන් අවසන් කිරීමට නියමිතය .එය යළි අද (27) මාවනැල්ලේ සිට ගලිගමුව දක්වා ගමන් කරනු ඇත. ගලිගමුවෙන් 28 දින ආරම්භ වන පා ගමන එදින පස්වරුවේ දංඕවිටට ලඟා වනු ඇත. පසුදින (29) දංඕටින් ආරම්භ වන පාගමන යක්කල දක්වා ගමන් ගනී. යක්කලින් 30 දින ආරම්භ වන පාගමන පෑලියගොඩින් අවසන් වීමට නියමිතය.
මැයි දින රැළිය හා එක්ව කැම්බල් පිටියෙන් ගමන් ආරම්භ කරන පාගමන අවසන් වීමට නියමිතව තිබෙන්නේ නිදහස් මාවතෙනි. මහනුවර සිට කොළඹ දක්වා කිලෝ මීටර 116 ක් දින පහක් පුරා ගමන් ගැනීමට නියමිතය.
