පොදු දේපළ පනත යටතේ විමර්ශනය කෙරෙන, රජයේ අරමුදල් රුපියල් ලක්ෂ 166ක් වැය කරමින් එංගලන්තයේ පෞද්ගලික සංචාරයක නිරත වීමේ සිද්ධියට අදාළව හිටපු ජනාධිපති රනිල් වික්රමසිංහ සහ හිටපු ජනාධිපති ලේකම් සමන් ඒකනායකට එරෙහි විමර්ශන අවසන් කර ඇති බව අපරාධ පරීක්ෂණ දෙපාර්තමේන්තුව (CID) අද (08) කොටුව මහේස්ත්රාත් අධිකරණයට දැනුම් දුන්නේය.
ඒ අනුව මෙම සිද්ධියට අදාළ විමර්ශන උදෘත ඉදිරි පියවර සඳහා නීතිපති දෙපාර්තමේන්තුව වෙත යොමු කර ඇති බව ද අපරාධ පරීක්ෂණ දෙපාර්තමේන්තුව අධිකරණය හමුවේ ප්රකාශ කළේය.
නඩුව කොටුව මහේස්ත්රාත් පසන් අමරසිංහ හමුවේ අද නැවත කැඳවනු ලැබූ අතර, හිටපු ජනාධිපති රනිල් වික්රමසිංහ සිය බිරිඳ වන මෛත්රී වික්රමසිංහ ද සමඟ අධිකරණය හමුවේ පෙනී සිටියේය. හිටපු මැති ඇමැතිවරුන් කිහිපදෙනකු ද මෙම අවස්ථාවේදී අධිකරණ භූමියට පැමිණ සිටිනු දක්නට ලැබිණි.
මෙහිදී රජයේ ජ්යෙෂ්ඨ නීතිඥ සමදරී පියසේන අධිකරණයෙන් ඉල්ලා සිටියේ, විමර්ශන අවසන් කර නීතිපතිවරයා වෙත උදෘත යොමු කර ඇති බැවින්, මේ සම්බන්ධයෙන් නීතිපතිවරයාගේ ස්ථාවරය දැනුම් දීම සඳහා දිනයක් ලබා දෙන ලෙසයි.
එහිදී රනිල් වික්රමසිංහ වෙනුවෙන් පෙනී සිටි ජනාධිපති නීතිඥ අනුජ ප්රේමරත්න අධිකරණය හමුවේ කරුණු දක්වමින් කියා සිටියේ, මෙම නඩුවට පාදක වන සම්පූර්ණ මුදලින් අඩක් පමණ වාහන වෙනුවෙන් වැය කර ඇති බව විමර්ශකයන් ප්රකාශ කර ඇති බවයි. එහෙත්, තම සේවාදායකයාට මෙම සංචාරය සඳහා වාහන පහසුකම් ලබා දුන්නේ බ්රිතාන්ය රජය විසින් බවත්, ඊට අදාළව බ්රිතාන්ය රජය අනුගමනය කළ පියවර ඇතුළත් නිල ලේඛනයක් රජයේ නීතිඥවරිය වෙත විවෘත අධිකරණයේදී භාර දෙන බවත් ඔහු පැවසීය. එමෙන්ම ඒ පිළිබඳව ද වෙනම විමර්ශනයක් පවත්වන ලෙස ජනාධිපති නීතිඥවරයා ඉල්ලා සිටියේය.
ඉදිරිපත් වූ කරුණු සලකා බැලූ මහේස්ත්රාත්වරයා, පැමිණිල්ල ලබන සැප්තැම්බර් 30 වැනිදා නැවත කැඳවීමට දින නියම කළේය. එදිනට මේ සම්බන්ධයෙන් වන නීතිපතිවරයාගේ ස්ථාවරය අධිකරණයට දැනුම් දෙන ලෙස ද රජයේ නීතිඥවරියට නියෝග කෙරිණි.
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්රෑම් සමූහයන්ට එක්වෙන්න.
රජයේ අරමුදල් රුපියල් ලක්ෂ 166ක් අවභාවිත කරමින් බ්රිතාන්යයේ පෞද්ගලික සංචාරයක නිරත වූ බවට චෝදනා කරමින් අපරාධ පරීක්ෂණ දෙපාර්තමේන්තුව විසින් හිටපු ජනාධිපතිවරයාට සහ ඔහුගේ ලේකම්වරයාට එරෙහිව මෙම නඩුව පවරා ඇත.
