පසුගිය මැයි 31 වැනිදා මීගොඩ ප්රදේශයේ දන්සලක පෝලිමක සිටි පිරිසක් වෙත කැබ් රථයක් කඩා වැදීමෙන් පුද්ගලයන් හය දෙනෙකු ජීවිතක්ෂයට පත්වීමේ ඛේදජනක සිදුවීමට සම්බන්ධ, දැනට පලාගිය සැකකරුවන් තිදෙනෙකු සොයා ගැනීම සඳහා ශ්රී ලංකා පොලිසිය මහජන සහයෝගය ඉල්ලා සිටියි.
අවිස්සාවේල්ල – කොළඹ මාර්ගයේ මීගොඩ හන්දිය අසලදී මෙම අනතුර සිදු වූ අතර, ඉන් පුද්ගලයන් හය දෙනෙකු මියගොස් තවත් හත් දෙනෙකු බරපතළ තුවාල ලැබීය. අනතුර සිදුකළ කැබ් රථයේ රියදුරු අත්අඩංගුවට ගෙන ජූනි 01 වැනිදා හෝමාගම මහේස්ත්රාත් අධිකරණයට ඉදිරිපත් කිරීමෙන් අනතුරුව ජූනි 16 වැනිදා දක්වා රක්ෂිත බන්ධනාගාරගත කර ඇත.
පොලිස් විමර්ශනවලදී හෙළි වී ඇත්තේ අනතුර සිදුවන අවස්ථාවේදී රියදුරුට අමතරව තවත් පුද්ගලයන් තිදෙනෙකු එම කැබ් රථය තුළ ගමන් කර ඇති බවයි. රියදුරු අත්අඩංගුවට ගන්නා අවස්ථාවේදී මෙම පුද්ගලයන් තිදෙනා වාහනයෙන් බැස පලාගොස් තිබේ.
ඔවුන් සොයා ගැනීම සඳහා විශේෂ විමර්ශන කණ්ඩායම් දෙකක් යොදවා ඇති අතර, සැකකරුවන් හඳුනා ගැනීමට සහ ඔවුන් සිටින ස්ථානයක් පිළිබඳව තොරතුරු ලබා දීමට සහය වන ලෙස පොලිසිය මහජනතාවගෙන් ඉල්ලා සිටියි.
පොලිසිය විසින් ප්රසිද්ධ කරන ලද සැකකරුවන්ගේ තොරතුරු:
-
අත්තනායකගේ දොන් වසන්ත – නො. 243/D, කුඩමඩුව, සිද්ධමුල්ල, පිළියන්දල (කැබ් රථයේ ලියාපදිංචි අයිතිකරු).
-
එස්.කේ. කුමාර හෙවත් සෙල්ලමුත්තු සෙල්ලකුමාර් – නො. 342/D, පැළන්වත්ත, පන්නිපිටිය.
-
දොන් සරත් හෙට්ටිගේ – නො. 337/07, පැළන්වත්ත, පන්නිපිටිය.
මොවුන් පිළිබඳව යම් තොරතුරක් දන්නේ නම් මීගොඩ පොලිස් ස්ථානාධිපති (071-8592179) හෝ රථවාහන අංශයේ ස්ථානාධිපති (077-9494188) අමතා දැනුම් දෙන ලෙස පොලිසිය වැඩිදුරටත් ඉල්ලා සිටියි.
