ශ්රියානි විජේසිංහ –
මේ දිනවල දිවයින පුරා ඉන්ෆ්ලුවන්සා B රෝගය පැතිර යාමේ සීග්ර වර්ධනයක් දක්නට ලැබෙන බැවින්, ඒ පිළිබඳව වඩාත් කල්පනාකාරී වන ලෙස වෛරස් රෝග විශේෂඥ වෛද්ය ජූඩ් ජයමහ ජනතාවගෙන් ඉල්ලා සිටියි.
වසංගත රෝග විද්යා අංශයේ දත්තයන්ට අනුව, පසුගිය අප්රේල් මාසයේදී වාර්තා වූ රෝගීන්ගේ ප්රතිශතය සියයට 17කින් වැඩි වූ බවත්, මැයි මාසයේ ගෙවී ගිය සති දෙකක කාලය තුළ එය සියයට 24ක් දක්වා ඉහළ ගොස් ඇති බවත් පෙනි ගොස් ඇත. දිවයින පුරා රෝහල් 20ක් කේන්ද්ර කරගනිමින් ක්රියාත්මක වන ආවේක්ෂණ පද්ධතිය හරහා, රෝහල් වෙත පැමිණෙන උණ රෝගීන්ගේ සෙම පටල සාම්පල පරීක්ෂා කිරීමේදී මෙම රෝගීන් හඳුනාගෙන තිබේ.
රෝගයේ ස්වරූපය සහ පැතිරීම
ඉන්ෆ්ලුවන්සා වෛරසය මෝසම් වර්ෂාව සක්රීය වන කාලසීමාවන්හිදී, එනම් අප්රේල් සිට ජූනි දක්වාත්, දෙසැම්බර් සිට පෙබරවාරි දක්වාත් පැතිර යාම සාමාන්ය තත්ත්වයක් බව වෛද්ය ජූඩ් ජයමහා පෙන්වා දෙයි.
මෙම රෝගය සීග්රයෙන් ව්යාප්ත වන ස්වභාවයක් ගත්තද, සාමාන්යයෙන් දින දෙක තුනකදී ඉබේම සුව වීමේ ප්රවණතාවක් පවතී. රෝගය පැතිරීම පාලනය කිරීම සඳහා රෝගය වැළඳුණු පුද්ගලයන් නිවෙස්වලට වී රැඳී සිටීමත්, කැස්ස හෝ කිවිසුම් යාමේදී ලේන්සුවක් හෝ වැළමිට භාවිත කර මුඛය සහ නාසය ආවරණය කර ගැනීමත් ඉතා වැදගත් වේ.
කෙසේ වෙතත්, ගැබිනි මව්වරුන්, කුඩා දරුවන්, නිදන්ගත රෝගීන් සහ වැඩිහිටි පුද්ගලයන් මේ පිළිබඳව විශේෂ අවධානයක් යොමු කළ යුතුය. ඔවුන්ට උණ, කැස්ස සහ සෙම්ප්රතිශ්යාව සමඟ හුස්ම ගැනීමේ අපහසුතාවක් මතු වුවහොත්, එය නියුමෝනියා තත්ත්වය දක්වා වර්ධනය විය හැකි බැවින් ප්රමාද නොවී වෛද්ය ප්රතිකාර සඳහා යොමු විය යුතුය.
එසේම, වෛද්ය උපදෙස්වලින් තොරව වේදනා නාශක ඖෂධ ලබා ගැනීමෙන් නියුමෝනියාව හෝ ශරීර අවයව අකර්මන්ය වීම වැනි බරපතළ සංකූලතා ඇති විය හැකි බවට වෛද්යවරයා අනතුරු අඟවයි.
ඉදිරියේදී එළඹෙන වෙසක් උත්සව සමයේදී ජනතාව විශාල වශයෙන් ගැවසෙන ස්ථානවලදී මෙම වෛරසය පහසුවෙන් ව්යාප්ත විය හැකි බැවින්, පොදු ස්ථානවලදී සෞඛ්යාරක්ෂිත ක්රමවේද අනුගමනය කරමින් කල්පනාකාරීව කටයුතු කරන ලෙස වෛද්ය ජූඩ් ජයමහා වැඩිදුරටත් අවධාරණය කරයි.
