ඉඳුනිල් කහටපිටිය –
අද (14) දින පෙරවරු 8.30 සිට පස්වරු 5.30 දක්වා වූ කාලය තුළ ලැබී ඇති වර්ෂාපතන දත්ත මත ලංකාවේ වැඩිම වර්ෂාපතනය වාර්තා වී තිබුණේ වේයන්ගොඩිනි. එම ප්රමාණය මිලි මීටර 142කි.
මේ වනවිට වාරිමාර්ග දෙපාර්තමේන්තුව නිකුත් කර ඇති නිවේදනයේ දැක්වෙන්නේ අත්තනගලු ඔය ආශ්රිත පහත් බිම්වල සුලු ගංවතුර තත්ත්වයක් ඇතිවිය හැකි බවය.
එම නිවේදනය අනුව අත්තනගලු ඔය සහ උරුවල් ඔය නිම්නවල පහත්බිම් ප්රදේශවලින් ඇතැම් ප්රදේශවලට සුළු ගංවතුර තත්ත්වයක් ඇතිවීමේ අවධානමක් පවතී.
අත්තනගලු ඔය ද්රෝණියේ ධාරා ප්රදේශවලට පසුගිය පැය කිහිපය තුළ ලැබී ඇති සැලකිය යුතු වර්ෂාපතනය සහ එම ද්රෝණිය තුළ ස්ථාපිත ජල මාපකවල ජල මට්ටම් විශ්ලේෂණයට අනුව මෙම අනතුරු ඇඟවීම නිකුත් කර තිබේ.
ඒ අනුව දිවුලපිටිය, මීරිගම, අත්තනගල්ල, මහර, ගම්පහ, මිනුවන්ගොඩ, ජා ඇල, කටාන සහ වත්තල ප්රාදේශීය ලේකම් කොට්ඨාසවලට අයත් අත්තනගලු ඔය සහ උරුවල් ඔය නිම්නවල පහත්බිම් ප්රදේශවලට මෙම අවදානම පවතින බව සඳහන්ය.
එමෙන්ම එම පහත්බිම් ප්රදේශ හරහා වැටී ඇති ඇතැම් මාර්ග ස්ථාන කිහිපයකින් ජලයෙන් යටවීමේ අවදානමක්ද පවතින බව වාරිමාර්ග දෙපාර්තමේන්තුව පෙන්වා දෙයි.
මේ හේතුවෙන් අදාළ ප්රදේශවල පදිංචිකරුවන් සහ එම ප්රදේශ හරහා ගමන් කරන වාහන රියදුරන් දැඩි සැලකිල්ලෙන් කටයුතු කරන ලෙස දැනුම් දී ඇති අතර, අවශ්ය පියවර ගන්නා ලෙස ආපදා කළමනාකරණ අංශ වෙතද දැනුම් දී තිබේ.
කෙසේ වෙතත් අද (මැයි 14) දින සිදුකළ දත්ත විශ්ලේෂණ අනුව, ශ්රී ලංකාවට ඊසාන දෙසින් පිහිටා ඇති අඩු පීඩන කලාපය තවදුරටත් පවතී. එය ඉදිරි පැය 48 තුල එම පද්ධතිය ශ්රී ලංකාවෙන් ඉවතට ගමන් කරනු ඇතැයි අපේක්ෂා කෙරේ.
අද සවස 5.30ට කාලගුණ විද්යා දෙපාර්තමේන්තුව නිකුත් කළ පුරෝකථනයන්ට අනුව හෙට දිනයේ දි බස්නාහිර, සබරගමුව, සහ වයඹ පළාත්වලත් මහනුවර නුවරඑළිය ගාල්ල සහ මාතර දිස්ත්රික්කවලත් මිලි මීටර 150කට වැඩි ඉතා තද වැසි ඇදවැටෙනු ඇත.
උතුරු පලාතේ ඇතැම් ස්තානවලට මිලි මීටර 100ට වැඩි වැසි ඇතිවේ.
ගිගිරුම් සහිත වැසි සමග ඇතිවිය හැකි තද සුළං සහ අකුණු අනතුරුවලින් සිදුවන හානිය අවම කරගැනිමට අවශ්ය පියවර ගන්නා ලෙස ජනතාවගෙන් ඉල්ලා සිටී.
<
