හිටපු ජනාධිපති රනිල් වික්රමසිංහට එරෙහිව ක්රියාත්මක වන රාජ්ය මූල්ය අවභාවිතාව සම්බන්ධ විමර්ශනයකට අදාළව ප්රකාශයක් සටහන් කර ගැනීම සඳහා ඔහුගේ බිරිඳ වන මෛත්රී වික්රමසිංහට සිකුරාදා ( 20) අපරාධ පරීක්ෂණ දෙපාර්තමේන්තුව හමුවේ පෙනී සිටින ලෙස දැනුම් දී තිබේ.
අපරාධ පරීක්ෂණ දෙපාර්තමේන්තුවේ මූල්ය අපරාධ විමර්ශන කොට්ඨාසය විසින් සිදුකරන ලද මෙම දැනුම් දීම සම්බන්ධයෙන් අද (18) දින කොළඹ කොටුව මහෙස්ත්රාත් අධිකරණයට කරුණු වාර්තා කරනු ලැබීය.
හිටපු ජනාධිපතිවරයා සම්බන්ධයෙන් දැනට සිදු කෙරෙන විශේෂ විමර්ශනයකට අදාළව කරුණු විමසීම සඳහා ඇය මෙලෙස කැඳවා ඇති බව අධිකරණයේදී අනාවරණය විය.
ජනාධිපති රනිල් වික්රමසිංහ ජනාධිපති ධූරය හොබවන 2023 වසරේ දී සිය බිරිය වූ මෛත්රී වික්රමසිංහගේ උපාධි ප්රධානෝත්සවයක් සඳහා රාජ්ය මුදල් අවභාවිතා කරමින් බ්රිතාන්යයේ සිදුකළ පෞද්ගලික සංචාරයක් පිළිබඳව සිදුකරන විමර්ශනවලට අදාලව මෙම කැඳවීම සිදුකර තිබේ. සිදුවෙමින් ඇති පුළුල් විමර්ශනයේ එක් පියවරක් ලෙස මෛත්රී වික්රමසිංහගෙන් ප්රකාශ සටහන් කර ගැනීමට නියමිත බව පොලිස් ආරංචි මාර්ග සඳහන් කරයි.
මේ අතර, හිටපු ජනාධිපතිවරයාට එරෙහිව එල්ල වන මෙම චෝදනා සම්බන්ධයෙන් හිටපු අමාත්ය තලතා අතුකෝරල අදහස් දක්වා තිබේ. ඇය අවධාරණය කර ඇත්තේ හිටපු ජනාධිපතිවරයාට චෝදනා එල්ල කිරීමට තරම් ප්රමාණවත් හෝ ස්ථිර සාක්ෂි මෙතෙක් අනාවරණය වී නොමැති බවයි. මෙම විමර්ශන දේශපාලන අරමුණු මත පදනම් වූ ඒවා බවටද ඇය ප්රකාශ කර තිබේ.
මෙම විමර්ශන ක්රියාවලයට අදාලව මෙතෙක් අත් අඩංගුවේ පසුවූ හිටපු ජනාධිපති ලේකම් සමන් ඒකනායක ඇප මත මුදා හැරීමට අද කොළඹ මහෙස්ත්රාත් අධිකරණය නියෝග කළේය
