නිරිත දිග බෙංගාල බොක්ක මුහුදු ප්රදේශයේ පවතින ගැඹුරු පීඩන අවපාතය ඩවයඹ දෙසට ගමන් කර අද (10) දින පෙ.ව. 5.30 පමණ වන විට පීඩන අවපාතයක් දක්වා දුර්වල වෙමින් අද දහවල් කාලයේදී, ත්රිකුණාමලය සහ යාපනය අතර ශ්රී ලංකා වෙරළ තීරය හරහා ගමන් කිරීමට බොහෝ දුරට ඉඩ ඇති බව කාලගුණ විද්යා දෙපාර්තමේන්තුව නිකුත් කළ පුරෝකථනයේ දැක්වේ.
මෙතෙක් පැවතුන ගැඹුරු පීඩන අවපාතය, අද (10) දින පෙ.ව. 04.00 වන විට ත්රිකුණාමලය සිට කිලෝමීටර් 100 ක් පමණ උතුරට බරව ඊසාන දෙසින් පිහිටා තිබුණු බව එම දෙපාර්තමේන්තුව අද උදේ 5.30ට නිකුත් කළ නිවේදනයේ දැක්වේ.
එම නිවේදනයේ මෙසේ ද සඳහන්ය.
දිවයිනේ උතුරු අර්ධයේ අහස වලාකුළින් බරව පවතී.
උතුරු පළාතෙත් පුත්තලම, අනුරාධපුර සහ ත්රිකුණාමලය දිස්ත්රික්කවලත් විටින් විට වැසි හෝ ගිගුරුම් සහිත වැසි ඇතිවේ. උතුරු පළාතේ ඇතැම් ස්ථානවලට මි.මී. 100 ට වැඩි තද වැසි ඇති විය හැක.
කුරුණෑගල, පොළොන්නරුව සහ මාතලේ දිස්ත්රික්කවල වැසි වාර කිහිපයක් ඇතිවිය හැක.
සෙසු ප්රදේශවල සවස් කාලයේ හෝ රාත්රී කාලයේදී ස්ථාන ස්වල්පයක වැසි හෝ ගිගුරුම් සහිත වැසි ඇති විය හැක.
උතුරු පළාතේ විටින් විට හමන පැ.කි.මී. (50-60) දක්වා වන ඉතා තද සුළං සමඟ විටින් විට හමන පැ.කි.මී. 70 දක්වා වන ප්රහාරාත්මක සුළං ඇතිවිය හැක. වයඹ පළාතෙත් මාතලේ, ත්රිකුණාමලය සහ නුවරඑළිය දිස්ත්රික්කවලත් විටින් විට හමන පැ.කි.මී. (40-50) දක්වා වන තද සුළං ඇතිවිය හැක.
ගිගුරුම් සහිත වැසි සමග ඇතිවිය හැකි තාවකාලික තද සුළං වලින් සහ අකුණු මඟින් සිදු වන අනතුරු අවම කර ගැනීමට අවශ්ය පියවර ගන්නා ලෙස කාලගුණ විද්යා දෙපාර්තමේන්තුව ජනතාවගෙන් ඉල්ලා සිටී.
