අසේල කුරුළුවංශ –
ඇල්කඩුව වැවිලි සමාගමට අයත් පිටකන්ද, බණ්ඩාරපොල හා හපුගස්පිටිය වතු අධිකාරිවරු හිටිහැටියේ මාරුකර සභාපතිවරයාට හිතවත් පිරිසකට ඒවාහි පාලනය බාරදීමේ උත්සහයක් පවතින බවට වතු සේවකයෝ චෝදනා කරති.
පිටකන්ද වත්ත භාරව සිටි ජ්යෙෂ්ඨ වතු අධිකාරිවරයා හපුගස්පිටිය රබර් වත්තට මාරුකර තිබෙන අතර ප්රධාන කාර්යාලයෙන් පිරිසක් පැමිණ පෙරේදා (05) එම වත්තේ සේප්පුවට මුද්රා තබා ඇත.
පසුගිය දිනවල පැවැති අධික වර්ෂාව හේතුවෙන් පිටකන්ද හා බණ්ඩාරපොල තේ වතු වල ස්ථාන කිහිපයක් නාය ගොස් තිබියදී පාලනාධිකාරිය විසින් ගනු ලැබ තිබෙන මෙම හදිසි තීරණයට එරෙහිව ඉදිරියේදී වර්ජනයක් ක්රියාත්මක කිරීමට සැළසුම් කර තිබෙන බව වතු සේවකයෝ පවසති.
බණ්ඩාරපොල වත්තේ කන්දේනුවර ක්ෂේත්රයේ වතු සේවක පිරිසක්ද වතු අධිකාරිවරයා මාරු කිරීම හා නාය යෑම් වලින් බලපෑමට ලක්වූ පුද්ගලයින් සම්බන්ධයෙන් කඩිනම් ක්රියාමාර්ග නොගැනීම සම්බන්ධයෙන් පෙරේදා (05) විරෝධතාවක නිරතව ඇත.
ඇල්කඩුව වැවිලි සමාගමට යටතේ තේ වතු 06 ක්, රබර් වතු 02 ක්, පොල්වත්තක් හා පලතුරු වත්තක් පවතින අතර මේවා පාලනය සඳහා සිටින්නේ ජ්යෙෂ්ඨ වතු අධිකාරිවරු දෙදෙනෙකු, වතු අධිකාරිවරු දෙදෙනෙකු හා වැඩ බැලීම සඳහා පත් කළ වතු අධිකාරිවරු දෙදෙනෙක් පමණි.
මේ හේතුවෙන් වතු අධිකාරිවරුන්ට වතු කිහිපයක වැඩ බැලීමට සිදුව ඇත. ඇතැම් වතුවල වතු නිල නිවාසයන්හි වතු අධිකාරිවරු පදිංචිව නොසිටීම හේතුවෙන් සැලගම, පිටකන්ද, හපුගස්පිටිය, බණ්ඩාරපොල හා මිල්ලවාන වතු වල වතු අධිකාරි හා සහකාර වතු අධිකාරි නිල නිවාස කිහිපයක් ගරා වැටෙන තත්ත්වයට පත්ව තිබේ.
වෙනත් රාජ්ය ආයතනයක සේවයේ නියුතු පුද්ගලයෙකුගේ නම වතු සේවක ලැයිස්තුවකට ව්යාජ ලෙස යොදා රුපියල් 45000 ක මුදලක් ලබාගත් බව කියන සිද්ධියක් සම්බන්ධයෙන් ජ්යෙෂ්ඨ වතු අධිකාරිවරයෙකුට විගණන විමසුමක් මගින් චෝදනා එල්ල කර තිබියදී එම පුද්ගලයාට වතු කිහිපයක් බාරදීමේ සූදානමක් පවතින බවට ද වතු සේවකයෝ චෝදනා කරති.
තාවකාලික මාරුවක් ලබා දීමෙන් පසු පිටකන්ද වත්තේ වතු අධිකාරිවරයා අසනීප නිවාඩු වාර්තා කර සේවයට නොපැමිණීම හේතුවෙන් වත්තේ වැඩකටයුතු බාධාවකින් තොරව පවත්වාගෙන යෑම සඳහා සේප්පුවට සීල් තබා වැඩ බැලීම සඳහා වතු අධිකාරිවරයෙකු යොමු කළ බව මේ සම්බන්ධව කළ විමසීමකදී ඇල්කඩුව වැවිලි සමාගමේ සභාපති නිරෝෂන් කරුණාරත්න කීය.
විගණන විමසුම මගින් චෝදනා එල්ල කර තිබෙන ජ්යෙෂ්ඨ වතු අධිකාරිවරයාගෙන් නිදහසට කරුණු විමසා අවසන් බවත් ඒ සම්බන්ධ විමර්ශන සිදු කෙරෙන බවත් කී සභාපතිවරයා චෝදනා එල්ල වූ පමණින් සේවකයෙකු වරදකරුවෙකු නොවන බවද අවධාරණය කළේය.
වතු අධිකාරිවරු කිහිප දෙනෙකුගේම වැඩ අත්හිටුවා පරීක්ෂණ සිදු කෙරෙන බවත් ඔවුන්ගේ පරීක්ෂණ නිම වනතෙක් නවක බඳවා ගැනීම් සිදු කිරීමට නොහැකි නිසා මේ වනවිට වතු අධිකාරිවරුන්ගේ හිඟයක් නිර්මාණය වී තිබෙන බවද සභාපතිවරයා පැවසුවේය.
