වැලිගම ප්රාදේශීය සභාවේ සභාපති ලසන්ත වික්රමසේකර නොහොත් ලසාට වෙඩි තබා ඝාතනය කිරීම කලක් ඔහු සමඟ පාතාල අපරාධවල නිරත වූ කල්ලියේම ප්රබලයකුගේ වැඩක් බවට සැක කරන තොරතුරු රැසක් විමර්ශන කණ්ඩායම් වෙත ලැබී තිබේ.
මෙම ඝාතනයේ සැකය මේ වන විට එල්ල වී ඇත්තේ බූස්ස බන්ධනාගාරයේ රඳවා සිටින මිදිගම රුවන් නමැති පාතාලයේ ප්රබලයා වෙතය. හරක් කටාගේ ප්රධාන ගෝලයෙක් වන මිදිගම රුවන් 2024 වසරේ මැයි 30 වැනිදා ඩුබායිහිදී අත්අඩංගුවට ගෙන මෙරටට රැගෙන එන ලදී. හරක් කටාගේ තවත් ප්රධාන ගෝලයෙක් වන මිදිගම චූටි මේ වන විට ඕමාන් බන්ධනාගාරයක රඳවා සිටියි. අපරාධ පරීක්ෂණ දෙපාර්තමේන්තුවේ දූෂිත නිලධාරීන්ගේ ද සහාය ඇතිව හරක් කටාව අපරාධ පරීක්ෂණ දෙපාර්තමේන්තුවෙන් පැන්නීමට පසුගිය කාලයේ ඩුබායිහි සිට සැලසුම් කරනු ලැබුවේ ද මිදිගම රුවන් සහ චූටි එක්වය.
මිදිගම ලසා – මිදිගම රුවන් ගැටුම
ඝාතනයට ලක්වූ ප්රාදේශීය සභා සභාපති ලසන්ත වික්රමසේකර නොහොත් ලසා ද හරක් කටාගේ කල්ලියේ කාලයක් තිස්සේ සිටි ප්රබල ක්රියාකාරිකයෙකු ලෙස පොලීසිය හඳුනාගෙන සිටියේය. හරක් කටා මැඩගස්කරෙය්දී එරට පොලීසියට හසුවී මෙරටට භාරදීමෙන් අනතුරුව ලසන්ත වික්රමසේකර ඔහුගෙන් ඈත් වී ඇති බව සඳහන්ය.
ඒත් සමඟම හරක් කටාගේ කණ්ඩායම සහ ලසන්ත වික්රමසේකර අතර හිත් අමනාපයක් වී ඇති බව සඳහන්ය. පසුගිය සැප්තැම්බර් 24 වැනිදා වැලිගම ඉබ්බාවල කළ වැටලීමකදී පොලිස් විශේෂ කාර්ය බළකාය විසින් සොයාගත් ටී – 56 ගිනිඅවි 04 ද මිදිගම රුවන්ට අයත් බව අනාවරණය වී තිබුණි. මිදිගම රුවන්ගේ ඥාතියකුගේ නිවසක ගිනිඅවි සඟවා තිබී ඇත.
ඒ සම්බන්ධයෙක් අඹුසැමි යුවළක් ද පොලිස් විශේෂ කාර්ය බළකාය විසින් අත්අඩංගුවට ගෙන තිබුණි. මෙම ඝාතනය හා එම ගිනිඅවි විශේෂ කාර්ය බළකාය විසින් සොයා ගැනීම අතර යම් සම්බන්ධයක් ඇතැයි සැකයක් ද පවතී. එම ගිනිඅවි සොයාගැනීමට පොලිස් විශේෂ කාර්ය බළකායට ඔත්තුව ලබා දුන්නේ ලසන්ත වික්රමසේකර බවට තදබල සැකයකින් මිදිගම රුවන් සිට ඇති බවට තොරතුරු ද විමර්ශන කණ්ඩායම් වෙත ලැබී ඇත.
ලසන්ත වික්රමසේකරට මිදිගම රුවන්ගේ කල්ලියෙන් පසුගිය කාලය පුරාම තර්ජන එල්ලවී තිබී ඇත.
’ගරු සභාපතිතුමෝ, ඔයා දැන් සුදු ඇන්දට අමතක කරන්න එපා ඔයා කළු අඳින කාලේ අපි ඔක්කොම එක ගොඩේ හිටිය වග. බොරු කියලා නාට්ටි දාලා මගේ එක කොල්ලෙක් හරි හිරකරන්න හැදුවොත් මම ඇත්ත කියලා ඔයාගේ සුදු රෙද්ද ඔළුවෙන් ගලවලා දාන්න දෙපාරක් හිතන්නේ නැහැ. අනික උඹට මම ගහන්න ඉන්නවා කිය කියා එක එකාට කියන්න එපා. මම ප්රතිපත්තියක් වශයෙන් හරක් මරන්නේ නෑ.’යනුවෙන් ද පසුගිය කාලයේ මිදිගම රුවන් සිය මුහුණුපොතේ සටහනක් ද තබා තිබී ඇත. එම සටහන තබා ඇත්තේ ද ඔහු බන්ධනාගාරයේ රඳවා සිටියදීය.
ලසාගෙන් පොලිස්පතිට ලිපියක්….
තමාට ජීවිත තර්ජන එල්ල වී ඇති බව සඳහන් කරමින් ලසන්ත වික්රමසේකර විසින් පසුගිය අගොස්තු 29 වෙනිදා පොලිස්පතිවරයාට ලිපියක් ද යොමුකර තිබී ඇති බව සඳහන්ය. මිදිගම රුවන්ගෙන් එම තර්ජනය එල්ල වී ඇති බව එහි සඳහන්ව තිබී ඇත.
“මා අධිකරණයට පැමිණෙන අවස්ථාවකදී හෝ ප්රාදේශීය සභාවට පිටත්ව යන අවස්ථාවකදී මා ඝාතනය කිරීමට ඔවුන් උත්සාහ දරන බවට මා හට විශ්වාසයක් පවතින බව සැලකර සිටිමි. මේ සම්බන්ධයෙන් ප්රධාන පාතාල කල්ලි ගණනාවක් මා හට තර්ජන එල්ල කර ඇත.”
“ඔවුන් මා ඝාතනය කරන බවට පවසා ඇති බවට මා හට, විශ්වාසදායක තොරතුරු ලැබී ඇති බව සැලකර සිටිමි. සමාජ මාධ්යයන් ඔස්සේ මාගේ ජීවිතයට තර්ජනයක් වන ආකාරයෙන් මිදිගම රුවන් හෙවත් රුවන් ජයසේකර නමැති පුද්ගලයා විසින් මුහුණුපොත හරහා පෝස්ටුවක් පළකර ඇති ආකාරයක් මාහට දැනගැනීමට හැකියාව ලැබුණා.”
“මෙම සියලු තත්ත්වයන් හේතුවෙන් මාගේ ජීවිතයට බරපතළ තර්ජනයක් එල්ල වී ඇති බවට මා හට දැනෙන බැවින්ද, ඒ බවට දැන් දැන් සිදු වන තර්ජන ඉතා ශීඝ්රයෙන් වර්ධනය වී ඇති බැවින් ද මාගේ ජීවිත ආරක්ෂාව සම්බන්ධයෙන් සුදුසු ක්රියාමාර්ගයක් ගැනීමට කටයුතු කරන මෙන් ඉතා ගෞරවයෙන් ඉල්ලා සිටිමි. එම ලිපියෙහි එසේ දක්වා තිබී ඇත.
වැලිගම ප්රාදේශීය සභාවේ ජාතික ජන බලවේගයේ සභික නීතිඥ තාරක නානායක්කාර මහතා නිවසට ඉකුත් ජූලි මස 16 වනදා වෙඩිතැබීමේ සිද්ධිය සම්බන්ධයෙන් චෝදනා එල්ල වූයේද ලසන්ත වික්රමසේකර වෙතය.
මේ ඝාතනයේ සැකකරුවන් මෙතෙක් හඳුනාගෙන නොමැති අතර, දකුණු පළාත භාර නියෝජ්ය පොලිස්පති කිත්සිරි ජයලත් ගේ උපදෙස් පරිදි ජ්යෙෂ්ඨ පොලිස් අධිකාරි වසන්ත ජයමිණි ගේ මෙහෙයවීම යටතේ වැලිගම පොලිස් ස්ථානාධිපති සනත් කුමාර ප්රමුක නිලධාරීන් පිරිසක් පරීක්ෂණ කණ්ඩායම් හතරක් යොදා පරීක්ෂණ ආරම්භ කර ඇත. ( දිනමිණ )
