ඉදිරි පැය 36ක කාලය තුළ අලව්ව, දිවුලපිටිය, මීරිගම, පන්නල, වෙන්නප්පුව, මීගමුව, කටාන සහ දංකොටුව යන ප්රාදේශීය ලේකම් කොට්ඨාසවලට අයත් මහ ඔය නිම්නයේ පහත්බිම් ප්රදේශවලට සැලකිය යුතු ගංවතුර තත්ත්වයක් ඇති විය හැකි වාරිමාර්ග දෙපාර්තමේන්තුව නිවේදනය කර ඇත.
එමෙන්ම දැදුරුඔය ද්රොණියේ පිහිටි වාරියපොල, නිකවැරටිය, මහව, කොබෙයිගනේ, බිංගිරිය, පල්ලම, හලාවත, ආරච්චිකට්ටුව, සහ රස්නායකපුර යන ප්රාදේශීය ලේකම් කොට්ඨාසවලට අයත් ගංවතුර නිම්නයේ පහළ ප්රවේශ වෙත ද ගංවතුර අවදානමක් දැඩිව පවතින බව එම නිවේදනයේ දැක්වේ.
මහ ඔය ද්රෝණිය සහ දැදුරු ඔය ද්රෝණිය ආශ්රිතව ඇද හැලෙන අධික වර්ෂාපතනය හමුවේ මහ ඔය සහ දැදුරු ඔය ආශ්රිතව ගංවතුර අනතුරු ඇඟවීමේ නිවේදනයක් නිකුත් කරමින් වාර්මාර්ග දෙපාර්තමේන්තුව වැඩිදුරටත් කියන්නේ මහ ඔය ද්රෝණියේ ඇතැම් ධාරා ප්රදේශයන්වලට මේ වනවිට සැලකිය යුතු වර්ෂාපතනයක් ලැබී ඇති බැවින් එම වර්ෂා තත්ත්වය සහ වාරිමාර්ග දෙපාර්තමේන්තුව මගින් මහ ඔය ද්රෝණිය පෝෂණය කරනු ලබන ගංඟාවල ජල මාපකවල ජල මට්ටම් විශ්ලේෂණය අනුව මෙම නිවේදනය නිකුත් කරන බවය.
දැදුරු ඔය ද්රෝණියේ ඉහළ හා මධ්ය ප්රවේශවලට ඇදහැලුණු සැලකිය යුතු වර්ෂා තත්ත්වය හේතුවෙන් දැදුරු ඔයේ ජල මට්ටම ගංවතුර තත්ත්වයට ආසන්න වෙමින් පවතින බවද වාරිමාර්ග දෙපාර්තමේන්තුව සඳහන් කරයි.
එමෙන්ම මේ වන විට දැදුරු ඔය ජලාශයේ පිටවාන් දොරටු විවෘත කර මේ වන විට තත්ත්පරයට ඝණ අඩි 16,250ක් තරම් සීග්රතාවයකින් දැදුරු ඔයට ජලය මුදා හරිමින් පවතින බවත් එම දෙපාර්තමේන්තුව සඳහන් කර ඇත.
මේ වන විට එම ජලාශයට ලැබෙන ජල ධාරිතාවය අනුව ඉදිරියේදී මෙම තත්ත්වය වැඩි විය හැකි බවට එම දෙපාර්තමේන්තුව පුරෝකථනය කර ඇත.
මේ හේතුවෙන් එම ජලාශ ආශ්රිතව පහළ නිම්නයන් හී පදිංචිකරුවන් මෙන්ම ඉහත දක්වා ඇති ප්රාදේශීය ලේකම් කොට්ඨාස ආශ්රිත පදිංචිකරුවන් මෙන්ම එම ප්රවේශ මාර්ග භාවිත කරන සියලු පාර්ශවයන්ගෙන් මේ පිළිබඳ අවධානයෙන් සිටින ලෙසත් වාරිමාර්ග දෙපාර්තමේන්තුව නිකුත් කළ නිවේදනයේ වැඩිදුරටත් සඳහන්ව තිබේ.
