මනම්පිටිය නිමල් ජයරත්න –
කොළඹ සිට මඩකලපු බලා ධාවනය වෙමින් තිබූ දුම්රියට කදුරුවල ගල්ලෑල්ල ප්රදේශයේදී අද (18) අළුයම 5.30ට පමණ වන අලියෙකු ගැටීමෙන් එම වන අලියා මියගොස් ඇති බව පොළොන්නරුව වනජීවී නිලධාරීහු පවසති.
එම වන අලියා දුම්රිය ගැටීමෙන් අනතුරුව නිවසක් අසලින් ප්රධාන මාර්ගයට ගොස් ඇද වැටුන අකාරය සිද්ධිය ඇසින් දුටු කිහිප දෙනෙක් අප සමග පැවසුවේය. වන අලියා දුම්රිය ගැටීමෙන් අනතුරුව අසාධ්ය තත්වයෙන් මාර්ගය හරහා ගමන් කරන අයුරු පුද්ගලයෙකුට ජංගම දුරකථනයෙන්ද පටිගත කර තිබිණි.
මෙසේ මිනිස්සුන්ගේ ඇස් ඉදිරිපිට මැරී වැටුන වන අලියාගේ වල්ගයෙන් අලි කෙඳි ගැලවීමට පුද්ගලයෙක් උත්සාහ කර තිබිණි. පසුව ඊට එරෙහි වූ වන ජීවී නිලධාරීන් සමග මෙම පුද්ගලයා ගැටුමකට යනු දැක ගත හැකි විය.
ප්රදේශවාසියෙකු සඳහන් කළේ මෙම වන අලියා නිරන්තයෙන්ම ගම් වදින බවය. ප්රදේශයේ වී ගබඩාවලට පහරදී වී ආහාරයට ගන්නා පුරුද්දක් ඇති මේ වන අලියා අද අලුයම තුනේ සිට මෙම ගම්මානයේ සැරිසරමින් සිටි බවත් එ් සම්බන්ධව වනජීවී නිලධාරීන් දැනුම්වත් කිරීමට උත්සාහ කළද ඔවුන් දුරකථන විසන්ධිකර තිබුනු බව ද ගැමියෙක් අප සමග කීවේය.
මියගොස් ඇති වනඅලියා වයස අවුරුදු 15ක් පමණ වන උස අඩි 8ක පමණ සත්වයෙකු බව වනජීවී නිලධාරීන් සඳහන් කරයි.
