ජනාධිපති අනුර කුමාර දිසානායක සහ ගේට්ස් පදනමේ ගෝලීය සංවර්ධන අංශයේ ප්රධානී ආචාර්ය ක්රිස් එලායස් (Dr. Chris Elias) ප්රමුඛ එම පදනමේ ඉහළ පෙළේ නියෝජිත පිරිසක් අතර හමුවක් අද (10) පස්වරුවේ ජනාධිපති ලේකම් කාර්යාලයේදී පැවැත්විණි.
ශ්රී ලංකාවේ සංවර්ධනයට අදාළ වැදගත් කරුණු රැසක් පිළිබඳ මෙහිදී සාකච්ඡා කෙරුණු අතර, කෘෂිකාර්මික නවීකරණය, අහාර හා පෝෂණය, ඩිජිටල් යටිතල පහසුකම් සහ ග්රාමීය ප්රජාව නව තාක්ෂණය සමඟ ඒකාබද්ධ කිරීම ආදී කරුණු පිළිබඳ විශේෂ අවධානයක් යොමු කෙරුන බව මේ හමුව පිළිබඳ නිවේදනයක් නිකුත් කරමින් ජනාධිපති මාධ්ය අංශය පවසයි..
ගේට්ස් පදනම, මෙරට ක්රියාවට නැංවීමට අපේක්ෂා කරන ප්රමුඛ වැඩසටහනක් වන අන්තඃකරණ ඩිජිටල් කෘෂිකාර්මික පරිවර්තන (Inclusive Digital Agriculture Transformation) වැඩසටහන පිළිබඳව මෙහිදී ආචාර්ය එලායස් විසින් ජනාධිපති අනුර කුමාර දිසානායක දැනුවත් කරන ලද අතර, කෘෂිකර්ම අංශයේ දත්ත මත පදනම් වූ තීරණ ගැනීමට සහාය වන අතරම, සුළු පරිමාණ ගොවීන්ට සේවා සැපයීම සඳහාද එය වැදගත් වන බව පෙන්වා දී තිබේ.
ඩිජිටල් ආර්ථිකයක් සඳහා වන ශ්රී ලංකාවේ උපායමාර්ගික සැලැස්මට සහාය දක්වන බව මෙහිදී සඳහන් කළ ගේට්ස් පදනමේ නියෝජිත පිරිස, ශ්රී ලංකාවේ ආර්ථිකය යළි යථා තත්වයට ගෙන ඒම සහ වර්ධනය සඳහා කෘෂිකාර්මික ක්ෂේත්රයේ ඩිජිටල් පරිවර්තනයක් කෙරෙහි වැඩි අවධානයක් යොමු කළ යුතු බව පවසා ඇත. එසේම, සත්ව පාලනය සහ කිරි නිෂ්පාදන වැනි ක්ෂේත්ර ඇතුළත් පුළුල් සමාජ- ආර්ථික සංවර්ධන න්යාය පත්රයකට සිය පූර්ණ සහාය ලබා දෙන බවටද ඔවුන් සහතික වී තිබේ.
ඩිජිටල් ආර්ථික නියෝජ්ය අමාත්ය එරංග වීරරත්න, ජනාධිපති ලේකම් ආචාර්ය නන්දික සනත් කුමානායක, ඩිජිටල් ආර්ථිකය පිළිබඳ ජනාධිපති ජ්යෙෂ්ඨ උපදේශක ආචාර්ය හාන්ස් විජේසූරිය, ජනාධිපති ජ්යෙෂ්ඨ අතිරේක ලේකම් රෝෂන් ගමගේ ගේට්ස් පදනමේ දකුණු හා අග්නිදිග ආසියානු කලාපීය නියෝජිත ආචාර්ය ජමාල් ඛාන්, වැඩසටහන් උපදේශන, සන්නිවේදන, වර්ධන, සහ අවස්ථා අධ්යක්ෂ අර්ච්නා ව්යාස්, ව්යවසාය දත්ත විසඳුම් අධ්යක්ෂ තුෂාන් විජේසිංහ Connect To Care සංවිධානයේ සභාපති චන්දිත සමරනායක මෙම අවස්ථාවට සහභාගි වූහ.
