දැනට සේවය අත්හිටුවා ඇති බන්ධනාගාර කොමසාරිස් ජෙනරාල් තුෂාර උපුල්දෙණිය අධිකරණ අමාත්යාංශයට ව්යාජ වාර්තාවක් ඉදිරිපත් කිරීම සම්බන්ධව අපරාධ පරීක්ෂණ දෙපාර්තමේන්තුවේ අවධානය යොමු වී ඇතැයි වාර්තා වේ. මේ තත්ත්වය තුළ ඔහු අත්අඩංගුවට පත්වීමේ අවදානමක් ඇති බව ද අභ්යන්තර ආරංචි මාර්ග පවසයි.
ජනාධිපති සමාව අවභාවිතා වී ඇති ආකාරය උසාවියේ දී අනාවරණය වී එය මාධ්ය මගින් වාර්තා කර රටේම අවධානය සිද්ධිය සම්බන්ධව ලක් කරවා ඇති අවස්ථාවක, සිද්ධිය සම්බන්ධව පූර්ණ හෙළිදරවු කිරීමක් පාර්ලිමේන්තුවේ දී විපක්ෂය විසින් සිදුකර තිබෙන පසුබිමක, සිද්ධිය මුල් කරගෙන රජයට සහ ජනාධිපතිවරයාට දැඩි ප්රහාරයක් එල්ලවෙමින් ඇති වටපිටාවක අධිකරණ අමාත්යාංශය විසින් මේ සම්බන්ධව පූර්ණ වාර්තාවක් බන්ධනාගාර කොමසාරිස්වරයාගෙන් ඉල්ලූ විට කිසිම ප්රශ්නයක් සිදුවී නැති බවත්, සියල්ල නීත්යානුකූලව සිද්ධ වී ඇති බවත්, සියලුම තොරතුරු විගණනයකට යොමු කර ඇති බවත් ඔහු අමාත්යාංශයට ලිඛිතව දැනුම් දී තිබීම විමර්ශන අංශවල දැඩි අවධානයට ලක් වී තිබේ.
එමෙන්ම මේ සිදුවීම නීත්යානුකූල බව තහවුරු කරමින් මාධ්ය නිවේදනයක් පවා නිකුත් කරන්නට බන්ධනාගාර දෙපාර්තමේන්තුව කටයුතු කර තිබිණි.
සාමාන්ය සිහියක් ඇති මනුෂ්යයෙක් කරනවා තබා කරන්නට හිතන්නේවත් නැති ආකාරයේ සිදුවීම් පෙළක් මේ වනවිට අනාවරණය වෙමින් තිබුණ ද මේ කිසිම සිදුවීමක් හා බැඳුනු මූල්ය ගනුදෙනු මේ දක්වා අනාවරණය වී නැතිවීමත් විමර්ශන අංශවලට පෙනී ගොස් ඇත.
මේ වනවිට රටේ බන්ධනාගාර සියල්ලම වෝහාරික විගණනයකට ලක් කිරීමට රජය කටයුතු කරමින් ඇති බව වාර්තා වේ.
