මනම්පිටිය නිමල් ජයරත්න –
විදුලිය සැර වැදීමෙන් මියගිය ඇති බවට සැකකරන වන අලියෙකුගේ සිරුරක් අද (29) උදෑසන පොළොන්නරුව වැලිකන්ද නාමල්ගම ගොවිපොලක් ආසන්නයේ තිබී හමු වූ බව වැලිකන්ද වනජීවී කාර්යාලය සඳහන් කරයි.
මෙම අලියා කුමන හේතුවකින් මිය යන්නට ඇත්ද යන්න නිශ්චිත වශයෙන් කිව නොහැකි බව වැලිකන්ද වනසත්ව නියාමක යූ.ඩී.එස්.එම්. කුමාරසිංහ අප කළ විමසීමකදී පැවසීය.
මියගිය වන අලියාගේ සිරුර ගොවීන් පිරිසක් දැක ඇති අතර ඒ සම්බන්ධ වැලිකන්ද වනජීවී නිලධාරී කාර්යාලයේ නිලධාරීන් දැනුවත් කිරීමෙන් පසු නිලධාරින් ඒ සම්බන්ධ පරීක්ෂණ කටයුතු සිදු කලහ.
මියගිය වන අලියා අවුරුදු 16 ක් පමණ වන සතෙකු බවත්, අලියාගේ පශ්චාත් මරණ පරීක්ෂණ කටයුතු අද සවස වනජීවී දෙපාර්තමේන්තුවේ ගිරිතලේ වනජීවි පශු වෛද්ය සමීර කලිගුආරච්චි ඇතුළු වනජීවී නිලධාරීන් කණ්ඩායමකගේ සහභාගිත්වයෙන් සිදුකිරීමට නියමිත බවද වැලිකන්ද වනසත්ව නියාමකවරයා වැඩිදුරටත් සඳහන් කළේය.
