ජනාධිපති අරමුදල සඳහා ඉල්ලීම් යොමු කිරීමට සහ ප්රතිලාභ ලබා ගැනීමේ ක්රමවේදය සරල කරමින් ප්රාදේශීය ලේකම් කොට්ඨාස මට්ටමින් අවස්ථාව ලබා දීමට රජය අදහස් කරන බව අගමැතිනී හරිනි අමරසූරිය අද (05) පාර්ලිමේන්තුවේ දී පැවසුවාය.
ඒ සඳහා පාලක මණ්ඩලයේ අනුමැතිය සහිතව දිවයිනේ පිහිටි ප්රාදේශීය ලේකම් කොට්ඨාස 341ම ආවරණය වන පරිදි ජනාධිපති අරමුදලේ අයදුම්පත් ලබා ගැනීමේ සේවා පුළුල් කිරීමටත් ඒ අනුව ප්රාදේශීය ලේකම් කාර්යාල මගින් සේවා ලාභීන්ට ගෙවීම් කටයුතු සිදුකිරීමටත් එම විෂයයන්ට අදාලව කටයුතු කරන, ප්රාදේශීය ලේකම් කාර්යාලවල සේවයේ නියුතු නිලධාරීන් සඳහා මූලික පුහුණුව ලබා දීමටත් ජනාධිපති අරමුදල මේ වනවිට කටයුතු කරමින් සිටින බව අගමැතිනිය කීවාය.
මේ සියලු කටයුතු සඳහා ජනාධිපති අරමුදල නව පරිගණක පද්ධතියක් හඳුන්වා දෙනු ලබන අතර එම පද්ධතිය හරහා අයදුම්පත් භාරගැනීම සිදුකිරීමට අපේක්ෂා කරන බවද අගමැතිනිය පැහැදිලි කළාය.
ඉන් පසු එම අයදුම්පත් මාර්ගගත ක්රමවේදය ඔස්සේ ප්රධාන කාර්යාලය වෙත යොමු කිරීමෙන් අනතුරුව ප්රධාන කාර්යාලයේ නිලධාරීන් මගින් අවශ්ය පරීක්ෂා කිරීම් සිදුකර ජනාධිපති අරමුදලේ සභාපති වූ ජනාධිපතිවරයාගේ අනුමැතියට යොමු කර ජනාධිපතිවරයාගේ අනුමැතිය ලත් අයදුම්කරුවන් වෙත අදාල ප්රාදේශීය ලේකම් කාර්යාලය හරහා ගෙවීම් කටයුතු සිදුකිරීමට රජය විසින් අපේක්ෂා කරනු ලබන බව අගමැතිනිය පාර්ලිමේන්තුවට දැන්වූවාය.
දිළිඳු බව තුරන් කිරීම, අධ්යාපන හෝ ඥානය වර්ධනය කිරීම, ආගම් නන්වාලීම සම්බන්ධ දායකත්වය ලබා දීම ජාතිය වෙනුවෙනුවෙන් සේවයක් සිදුකර ඇති පුද්ගලයින් සඳහා ප්රදානයක් සිදුකිරීම, ජනාධිපතිවරයාගේ හා පාලක මණ්ඩලයේ මතය අනුව ජනතා සුබ සිද්ධිය උදෙසා කාර්යයන් ඉටු කිරීම ජනාධිපති අරමුදල මගින් සිදුවේ.
වෛද්යාධාර ලබා දීම අඩු ආදායම් ලාභීන්ගේ දරුවන් සඳහා ශිෂ්යත්ව ලබා දීම, අඩු ආදායම්ලාභීන්ට ස්වයං රැකියා ලබා දීම ආදී කාර්යයන් ද සුවිශේෂී කොට සලසා ජනාධිපති අරමුදලින් ප්රතිපාදන සලසා දෙයි.
