දිනසේන රතුගමගේ –
මුලතිව් කෝකිලායී කොක්කුතුඩුවායි හා කනාර්ටුකේණී ඇතුලු ගම්මාන අටක ගොවීන් විසින් වගා කළ වී අස්වැන්න වන අලින්ට කෑමට දීමට ගොවීන් තීරණය කොට තිබේ.
එම කුඹුරුවල අස්වැන්න නෙලීමෙන් පසුව වී තොග සිය නිවෙස් වලට රැගෙන ඒමට නිසි මාර්ගයක් නොමැතිකම නිසාත් මහ වැසි මැද කුඹුරුවල රාත්රිය ගත කිරීම වන අලි ප්රහාර වලට ලක් වීමට හේතුවක් වියහැකි නිසාත් ගොවීන් මෙම තීරණය ගෙන ඇත.
වර්ෂාවට පෙර කොක්කුතුඩුවායි සිට කනාර්ටුකේණී දක්වා ගමන් කෙරෙන මාර්ගය ප්රතිසංස්කරණය කිරීමට මුලතිව් රාජ්ය නිලධාරීන් ක්රියා නොකිරීම නිසා කෝකිලායී කොක්කුතුඩුවායි හා කනාර්ටුකේණී ඇතුලු ගම්මාන අටක ගොවීන් මෙම අවාසනාවන්ත ඉරණමට මුහුණ පා සිටියි.
මහ වැසි මැද අස්වැන්න නෙලා ඉතා අසීරුවෙන් ගම්මාන වෙත රැගෙන එන ලද වී ගෝනී 4780 කින් 2900 ක් මාර්ගයේ වළවල් වලට ටැක්ටර හා කරත්ත පෙරළීම නිසා එම සම්පූර්ණ වී තොගයම ජලයට පෙගී විනාශ වී ගොස් තිබේ.
මෙම වී තොගයේ වටිනාකම රුපියල් ලක්ෂ 250 ක් පමණ වන බව එම ගොවීහු ප්රකාශ කොට සිටියි.
ගොවීන්ගේ කුඹුරු වලට යාමට ඒමට නිසි මාර්ගයක් නොමැති නිසා මුලතිව් කනාටුකේණී මාර්ගය ප්රතිසංස්කරණය කොට දෙන ලෙස වසර තුනක් තිස්සේ මුලතිව් නිලධාරින්ගෙන් මුලතිව් ගොවි සංවිධානය ඉල්ලා සිටියද නිලධාරීන් ඊට මැදිහත් නොවීම නිසා ගොවීන්ට මෙම පාඩුව විඳ ගැනීමට සිදුව ඇතැයිද ගොවි සංවිධාන නිලධාරීන් පෙන්වා දෙයි.
වර්ෂාව නොමැති නියං කාලයේදී එම කුඹුරුවලට යාමට හැකියාව ඇතත් වර්ෂා කාලයට එසේ කිරීමට වී ඇත.
වර්ෂා ජලයට හසු වූ වී තොගය මිලට ගැනීමට කිසිම වී මෝල් හිමියෙකු කැමැත්තක් නොදැක්වීම නිසා එම කුඹුරු යායේම වී තොග අලින්ට කෑම සදහා අතහැර දමන්නට ගොවීන් තීරණය කොට තිබේ.
මෙම පළාතේ ගොවීන් වැව් තුනක් යටතේ කුඹුරු අක්කර 325 ක් වගා කොට ඇති අතර එම කුඹුරු වර්ෂාවට හසු වී අවස්ථා දෙකකදීම විනාශ වී යාමෙන් පසුව ඉතිරි වූ වී තොග වලට මෙම ඉරණම අයත්ව තිබේ.
