දිනසේන රතුගමගේ –
ශ්රී ලංකාවේ සුප්රසිද්ධ මූල්ය සමාගමක් විසින් යාපනයේ වඩමරච්චි ප්රදේශයේ පවත්වා ගෙන යන ශාඛාවක උකස් තබන ලද ස්වර්ණාභරණ කට්ටල කීපයක්ම හොරකම් කිරීමේ චෝදනාව මත එම ශාඛාවේ හතර දෙනෙකු මරදන්කේණී පොලීසිය විසින් ඊයේ (21) අත් අඩංගුවට ගෙන තිබේ.
අත් අඩංගුවට පත් හතර දෙනාගෙන් දෙදෙනෙකු කාන්තාවන් වන අතර අනෙක් දෙදෙනා පිරිමි පුද්ගලයින් වන අතර ඔවුන් සියලුම දෙනා එම මූල්ය සමාගමේ සේවක සේවිකාවෝ වෙති.
ඔවුන් විසින් මූල්ය ආයතනයේ උකස් තබන ලද රුපියල් ලක්ෂ 22 ක් වටිනා ස්වර්ණාභරණ හොරකම් කොට ඇති බවට මූලික පරීක්ෂණ වලදී තොරතුරු අනාවාරණය වී ඇති අතර එම ප්රමාණය ඇතැම් විට ඊටත් වඩා වැඩි විය හැකි බවද යාපනය පොලීසිය සඳහන් කරයි.
අදාල සමාගම විසින් උකස් ගන්නා ලද ස්වර්ණභරණ එම ශාඛාවේ සේප්පුව තුළ ගබඩා කොට තිබියදී අතුරුදහන් වී තිබේ.
උකස් තබන ලද රන් භාණ්ඩ කට්ටල ආපසු බේරා ගැනීමට පැමිණි ගණු දෙණු කරුවන් කීපදෙනෙකුගේ ස්වර්ණාභරණ සේප්පුවේ නොතිබීම නිසා ඒ පිළිබදව සිදු කළ විමර්ශනයකදී හෙළි වී ඇත්තේ ස්වර්ණාභරණ බහා ලූ ඉටි කවර පමණක් තිබියදී ඒවා තුළ වූ ස්වර්ණාභරණ හොරකම් කොට ඇති බවයි.
මූල්ය ආයතනයේ උකස් අංශයේ නිලධාරීන්ගේ සහය නොමැතිව එවැන්නක් සිදු වීමට ඉඩක් නොමැති නිසා මූල්ය සමාගමේ කළමනාකාරවරයා සිද්ධිය සම්බන්ධයෙන් මරදන්කේණී පොලීසියට කළ පැමිණිල්ලකින් පසුව එක් සේවකයෙකු අත් අඩංගුවට ගෙන ප්රශ්න කිරීමේදී මෙම හොරකම පිළිබදව තොරතුරු අනාවරණය වී තිබේ.
අත් අඩංගුවට ගත් හතර දෙනා යාපනය අධිකරණය වෙත ඉදිරිපත් කිරීමට මරදන්කේණී පොලීසිය පියවර ගෙන තිබේ.
