ශ්රී ලංකා පොලිසියේ ඉන්නේ අතිශයින්ම දක්ෂ නිලධාරීන් බවත්, නොකා නොබී මෙහෙයුම් දියත් කර සිය දියණිය නිරුපද්රිතව තමන් වෙත ලබා දී සැකකරුවා අත් අඩංගුවට ගැනීමට හැකිවීම අතිශයින්ම ප්රසංශනීය බවත් දවුලගල ප්රදේශයේ දී පැහැරගත් දැරියගේ පියා වන එච්.එම්.එම් හිල්මි අද මාධ්යයට පැවසුවේය.
ඔහු කීවේ මෙවැන්නකි.
“මේ නිලධාරින් කන්න බොන්නෙත් නැතිව වැඩ කළා. වැඩ කරලා කොහොම හරි මෙයාව ඇල්ලුවා. මට ගොඩක් සන්තෝසයි. මගේ දුව මට ලැබුණා. ” ඔහු සුසුමක් පිට කළේය.
පොලිසියේ ක්රියාන්විතය සම්බන්ධව ඔහු කීවේ මෙවැන්නකි.
” පොලිසියෙ මහත්තුරු හරි දක්ෂයි. එයාලා කලබල නොවී ෆෝන් කෝල් ට්රැක් කරලා කොහෙද ඉන්නෙ කියලා බලලා ඉතාම දක්ෂ විදිහට ප්ලෑන් කරලා මිනිහව අල්ලා ගත්තා. ”
” නැත්නම් ගම්පලින් උස්සපු මිනිහා අම්පාර වෙනකම් කොහොමද ගේන්නෙ. ප්ලෑන් කරලා තියෙන්නේ පොලොන්නරුවේ. පොලොන්නරුවෙ වාහනය දාලා අම්පාරට ගෙනියලා… හොයා ගන්න බැරි විදිහට වැඩේ කරන්න උත්සාහ කරලා තියෙන්නේ. ඒත් කොහොම හරි ඒ ගොල්ලන්ගේ දක්ෂතාවයෙන් අල්ලා ගත්තා.”
” අද උදෙත් පල්ලියට ගිහින් ප්රාර්ථනා කළා දෙවියන්ට. මට කොහොම හරි උදව් කරන්න කිව්වා. මගේ දුව කිසිම හානියක් නැතිව මට ලැබුණා. මට සන්තෝසයි.” ඒ තාත්තා කීවේය.
පැහැරගෙන ගිය දැරිය සහ දැරිය පැහැරගත් තැනැත්තා අද අම්පාර බස් නැවතුමේ දී පොලිසිය විසින් සොයා ගත්තේය. ඔවුන් අම්පාර සිට නුවර බලා ධාවනය වීමට නියමිතව තිබූ බස් රථයක නැගී සිටියහ. දැරිය පොලිස් භාරයට ගෙන දැරිය පැහැරගත් පුද්ගලයා අත් අඩංගුවට ගනු ලැබුවේය. පොලිස් ප්රශ්නකිරීම්වලදී ඔහු කියා සිටියේ තරුණියට විවාහ පොරොන්දු දී තමන් ජපානයේ සිට ඉපැයූ මුදල් තරුණියගේ පියා ලබාගෙන තිබුණු බවය.
