බ්රිතාන්ය චැනල් 4 නාලිකාවේ විකාශය වූ පාස්කු ඉරුදින ත්රස්ත ප්රහාරය සම්බන්ධ විමර්ශනවලට අදාල ප්රකාශයක් ලබා දීම සඳහා අපරාධ පරීක්ෂණ දෙපාර්තමේන්තුවට කැඳවූ හිටපු රාජ්ය අමාත්ය ශිවනේෂතුරෙයි චන්ද්රකාන්තන් හෙවත් පිල්ලෙයාන් අදාල ප්රකාශය ලබා දීමෙන් පසු අපරාධ පරීක්ෂණ දෙපාර්තමේන්තුවෙන් පිටවී ගොස් තිබේ.
අද උදේ 9.30ට පැමිණි පිල්ලෙයාන්ගෙන් පැය 3කට ආසන්න කාලයක් මූලික ප්රකාශ සටහන් කරගැනීමට අපරාධ පරික්ෂණ දෙපාර්තමේන්තුව කටයුතු කළේය.
ඉකුත් වසරේ ජුනි මස 08 වනදා බ්රිතාන්ය චැනල් 4 නාලිකාව විකාශය කළ ආන්දෝලනාත්මක වීඩියෝවෙන් කියැවුනේ පාස්කු ප්රහාරය පිල්ලෙයාන්ගේ ද මැදිහත්වීම සහිතව සැලසුම් වුන ආකාරය ගැනය. එම කරුණු ප්රකාශ කරන්නේ පිල්ලෙයාන්ගේ කණ්ඩායමේ මාධ්ය ප්රකාශක ලෙස කටයුතු කළ, දැනට ස්විට්සර්ලන්තයේ රැඳී සිටින අසාද් මවුලානා නැමැත්තෙකි.
අදාළ වීඩියෝවේ අන්තර්ගත කරුණු සම්බන්ධයෙන් සොයාබලන ලෙස මහජන ආරක්ෂක අමාත්යාංශයට පැමිණිල්ලක් ලැබී තිබු අතර ඊට අදාළව අපරාධ පරීක්ෂණ දෙපාර්තමේන්තුව විමර්ශනයක් ආරම්භ කළේය.
ඒ අනුව එකී විමර්ශනයට අදාළව ප්රකාශ ලබාගැනීම සඳහා හිටපු රාජ්ය අමාත්ය ශිවනේෂතුරේ චන්ද්රකාන්තන් හෙවත් පිල්ලෙයාන් වෙත ඉකුත් 12 වනදා අපරාධ පරීක්ෂණ දෙපාර්තමේන්තුවට කැඳවා තිබුණි.
කෙසේ වෙතත් එදින හිටපු රාජ්ය අමාත්යවරයා අපරාධ පරීක්ෂණ දෙපාර්තමේන්තුව හමුවේ පෙනී නොසිටි අතර ඔහු සිය නීතිඥයින් මාර්ගයෙන් ප්රකාශ ලබාදීමට වෙනත් දිනයක් ඉල්ලා තිබුණි.
ඒ අනුව අද දින යළි අපරාධ පරීක්ෂණ දෙපාර්තමේන්තුව හමුවේ පෙනී සිටින ලෙස ඔහුට දැනුම් දී තිබු අතර අද පෙරවරු 9.30ට පමණ අපරාධ පරීක්ෂණ දෙපාර්තමේන්තුවට පැමිණි පිල්ලෙයාන් අදාල ප්රකාශය ලබා දී පිටව ගොස් ඇත.
