නූල් බෝලයක් සේ පැටලී ඇති පාස්කු ප්රහාරය විසඳා ගැනීමට කෙරෙන උත්සාහය අවුල් කර දමා හෝ තමන්වෙත එල්ල වීමට නියමිත බරපතල චෝදනා රැසකින් මිදීම සඳහා හිටපු ආණ්ඩුවේ ප්රබල දේශපාලනඥයෙකුගේ අවශ්යතාවය මත උදය ගම්මන්පිල හැසිරෙමින් ඇතැයි අතිශය විශ්වාසකටයුතු දේශපාලන ආරංචි මාර්ග ඔස්සේ වාර්තා වෙමින් ඇත.
දැනට පාස්කු විමර්ශනයේ ප්රබලයින් ලෙස හඳුනාගෙන රජය විසින් වගකීම් පැවරූ නිලධාරීන් දෙදෙනෙකුව ඉලක්ක කරගෙන ඔවුන් දඩයම් කරන අතරම සමස්ථ පාස්කු විමර්ශනය පිළිබඳවම ජනතා විශ්වාසය බිඳ දැමීම මෙම සැලසුමේ මූලික අරමුණ බව ද එම ආරංචි මාර්ග පෙන්වා දෙමින් තිබේ.
ඡන්දයක් ආසන්නයේ දියත් වී ඇති මෙම වෑයමට උදය ගම්මන්පිල කැමැත්තෙන්ම මැදිහත් වී ඇත්තේ නිශ්චිත දේශපාලන ඉලක්කයක් මත බවත්, ඔහු අතට යම් වාර්තාවක් පත් ඇත්තෙත් ඔහු පසුපස සිටින හිටපු ආණ්ඩුවේ ප්රබලයා බවත් වාර්තා වී තිබේ.
ගම්මන්පිල පසුපස සිටින පුද්ගලයාගේ එකම අභිප්රාය මේ වනවිට ඔහුට තර්ජනයක් වී ඇති නිලධාරින් දෙදෙනෙක් නිශ්ක්රීය කිරීම බව ද නිශ්චිත තොරතුරු වලින් හෙළි වී ඇත.
මේ වනවිට අරඹා ඇති පරීක්ෂණයකින් සහ සාක්ෂි ගොනුකර ඇරඹීමට නියමිත පරීක්ෂණයකින් වැරදිකරු වනු ඇති බවට වූ පැහැදිලි අදහසක් සහිත මෙම හිටපු ආණ්ඩුවේ දේශපාලන ප්රබලයෙක් අවස්ථාව බලා ක්රියාත්මක වී ඇති බවට අභ්යන්තර තොරතුරු මාර්ග කියයි.
කෙසේ වෙතත් මේ වනවිට පාස්කු ප්රහාරය උදෘත කොටගනිමින් එම විමර්ශනවලට බරපතල බලපෑම් එල්ල කරන උදය ගම්මන්පිලගේ දේශපාලන හැසිරීම කතෝලික පල්ලියේ ද දැඩි පිළිකුලට හේතු වී ඇත.
