අමායා උඩුවැරැල්ල –
බැල්ටිමෝර් හි ෆ්රැන්සිස් ස්කොට් කී පාලමේ ගැටුනු භාණ්ඩ ප්රවාහන නෞකාව සහ ඒ අසල ස්ථානය ඊයේ දින (27) පරීක්ෂා කළ බවත් එහිදී නෞකාව පාලමේ ගැටීමට මිනිත්තු කිහිපයකට පෙර අනතුරට මුහුණ දුන් පුද්ගලයන් ජීවිත බේරා ගැනීමට ගත් දැඩි උත්සාහයන් පිළිබඳ තොරතුරු සොයා ගැනීමට හැකි වී තිබෙන බවත් විදෙස් මාධ්ය වාර්තා කර තිබෙනවා.
පෙරේදා අලුයම පාලම කඩා වැටීමට මිනිත්තු කිහිපයකට පෙර එහි කටයුතු කල පුද්ගලයන් එයට මුහුණ දීමේ දී ඊට අදාල ව පටිගත වූ හඬපට කිහිපයක් ද සොයා ගැනීමට හැකිව තිබෙනවා.
පාලම මත සියලුම ගමනාගමනය නවත්වන ලෙසත්, පාලනය ගිලිහුණු නෞකාවක් ළඟා වන බවත්, වැඩ කරමින් සිටි කාර්ය මණ්ඩලයට පාලමෙන් පිටව යන ලෙස කල අනතුරු ඇඟවීම ඇතුළු මීළඟට ගන්නා පියවර පිළිබඳව සිදු කල කතාබහ ඵම පටිගත වූ හඬපට වල ඇතුලත් වූ බවයි විදෙස් මාධ්ය වාර්තා කර තිබෙන්නේ. එමෙන්ම විශාල හඬක් පසුබිමෙන් ඇසෙන අතර, එක් අයෙක් “මුළු පාලමම කඩා වැටුණා” යැයි පවසන ආකාරයක් ද පටිගතව තිබූ බව සඳහන් වනවා.
සිංගප්පූරු ධජය සහිත ඩාලි නෞකාව පාපන්දු ක්රීඩාංගණ තුනකට සමාන දිගකින් යුත් කන්ටේනර් නෞකාවක් වන අතර අනතුර සිදුවීමට පෙර එය පාලනයෙන් තොර බව වූ බව වාර්තා කර, නෞකාව මන්දගාමී කිරීමට නැංගුරම දමා, පාලම මත ගමනාගමනය නැවැත්වීමට බලධාරීන්ට ප්රමාණවත් කාලයක් ලබා දී ඉන් විශාල ජීවිත හානියක් වළක්වා ගත හැකිව තිබූ බව සඳහන් වනවා. මෙම අනතුර හේතුවෙන් එක්සත් ජනපද නැගෙනහිර මුහුදු තීරයේ කාර්යබහුලම ස්ථානයක් වන බැල්ටිමෝර් වරාය වසා දමා තිබෙනවා.
විශ්ලේෂකයින් පවසා තිබෙන පරිදි රක්ෂණ කටයුතු සඳහා ඩොලර් බිලියන ගණනක් වැය විය හැකි අතර එය වාර්තාගත නැව් රක්ෂණ පාඩුවක් වනු ඇති. එක්සත් ජනපදයේ ජාතික ප්රවාහන ආරක්ෂණ මණ්ඩලයේ විමර්ශකයින් අඟහරුවාදා දින නෞකාවේ දත්ත රෙකෝඩරය සොයා ගත් අතර නැවේ කාර්ය මණ්ඩලය, දිවි ගලවා ගත් අනෙකුත් අය සහ හදිසි ප්රතිචාර දැක්වූවන් සමඟ සාකච්ඡා කිරීමට නියමිත බව විදෙස් මාධ්ය දක්වා තිබෙනවා.
කන්ටේනර් නෞකාව පාලමේ ආධාරක කණුවක ගැටුනේ කෙසේද සහ ඇයිද යන ගැටලු සඳහා පිළිතුරු සෙවීමට කණ්ඩායමක් කිලෝමීටර් 2.6 ක් දිග පාලමේ නටබුන් පරීක්ෂා කිරීමට නියමිත අතර අනතුර හේතුවෙන් අතුරුදන් වූ කම්කරුවන් පිළිබඳව තවමත් තොරතුරක් නොමැති බව ද සඳහන් වනවා.වොෂින්ටනයේ මෙක්සිකානු කොන්සල් කාර්යාලයට අනුව මියගියා යැයි අනුමාන කරන අතුරුදන් වූ පුද්ගලයන් හය දෙනා ට මෙක්සිකෝව, ග්වාතමාලාව සහ එල් සැල්වදෝරයේ සංක්රමණිකයන් ඇතුළත් වනවා. පාලම් කාර්ය මණ්ඩලය පාර මතුපිට වළවල් අලුත්වැඩියා කරමින් සිටියදී මෙම අනතුර සිදුව තිබෙනවා.
කෙසේ වෙතත් බැල්ටිමෝර් වරාය විවෘත කිරීම කෙරෙහි අවධානය යොමු කල යුතු බවත් එක්සත් ජනපද වෙරළාරක්ෂක බලකායේ ප්රමුඛතාවයන් වන්නේ නැව් ගමනාගමනය සඳහා ජල මාර්ගය ප්රතිසංස්කරණය කිරීම, නෞකාව ස්ථාවර කිරීම සහ එය ඉවත් කිරීම බවත් ධවල මන්දිරයේ පැවති ප්රවෘත්ති සාකච්ඡාවකදී බලධාරීන් ප්රකාශ කරතිබෙනවා. නෞකාව ගෙන යාමට පෙර සුන්බුන් ඉවත් කිරීමට වෙරළාරක්ෂක බලකාය එක්සත් ජනපද හමුදා ඉංජිනේරු බලකාය සමඟ කටයුතු කරන බවත් එහිදී අවධාරණය කර ඇති අතර සුන්බුන් බවට පත් නෞකාවේ ආරක්ෂිත වාර්තාව කෙරෙහි අවධානය යොමු කළ නමුත්, එය තරමක් හොඳ ආරක්ෂිත වාර්තාවක් බව ඔවුන් වැඩිදුරටත් දක්වා තිබෙනවා. අනතුරට පත් වන විට නෞකාවේ භාණ්ඩ බහාලුම් 4,700 ක් තිබී ඇති අතර ඉන් 56 ක අන්තරායකර ද්රව්ය තිබූ නමුත් එයින් මහජනතාවට තර්ජනයක් නොමැති බව සඳහන් වනවා අනතුර සිදුවන අවස්ථාවේදී කන්ටේනර් දෙකක් මුහුදට වැටුනු නමුත් ඒවායේ අනතුරුදායක ද්රව්ය අඩංගු නොවූ බව වාර්තා වන අතර
නෞකාවේ ඉන්ධන තෙල් ගැලුම් මිලියන 1.5 කට වැඩි ප්රමාණයක් ප්රවාහනය කර තිබෙනවා.
බැල්ටිමෝර් වරාය වෙනත් එක්සත් ජනපද වරායන්ට වඩා මෝටර් රථ භාණ්ඩ ප්රවාහනය කරයි.වරාය දත්ත වලට අනුව 2022 වසරේ සිට වාහන 750,000 කට වඩා වැඩි ප්රමාණයක් මෙන්ම සීනි සිට ගල් අඟුරු දක්වා බහාලුම් සහ තොග භාණ්ඩ ද ප්රවාහනය කරයි. කෙසේ වෙතත් ආර්ථික විද්යාඥයින් සහ සැපයුම් විශේෂඥයින් පවසන්නේ, නැගෙනහිර මුහුදු තීරයේ ප්රතිවාදී නැව් මධ්යස්ථානවල ඇති ප්රමාණවත් ධාරිතාව හේතුවෙන් වරාය වසා දැමීම ප්රධාන එක්සත් ජනපද සැපයුම් දාම වලට අර්බුදයක් හෝ භාණ්ඩවල මිලෙහි විශාල වැඩිවීමක් සිදු නොවනු ඇතැයි තමන් විශ්වාස කරන බවයි. පාලම නොමැති වීම නිසා බැල්ටිමෝර් හරහා යන මාර්ග අවහිර වී ඇති අතර, රියදුරන්ට වෙනත් තදබදයක් සහිත වරාය හරස් මාර්ග දෙකකට යාමට සිදුවීමෙන් දෛනික ගමනාගමනය සහ කලාපීය ගමනාගමනය සංකීර්ණ වී ඇති බවත් විදෙස් මාධ්ය වාර්තාවල සඳහන්.
