ශ්රී ලංකා නාවික හමුදාව, කොළඹ සමුද්රීය මුදාගැනීමේ සම්බන්ධීකරණ මධ්යස්ථානය සමඟ සම්බන්ධීකරණයෙන් දකුණු වෙරළට ඔබ්බෙන් ආපදාවට ලක්ව තිබූ මෝටර් රහිත යාත්රාවක් ඊයේ (02) ගොඩබිමට රැගෙන විත් තිබිණි.
නවසීලන්තයට අයත් යාත්රාවක් වන ‘ලිට්ල් ඩොන්කි’ නැමති මෙම සමුද්ර පර්යේෂණ යාත්රාවේ පැඩලයක් ආධාරයෙන් සිදුවන ධාවන ක්රමයේ දෝෂයක් හේතුවෙන් යාත්රාව ක්රියා විරහිත වී ඇත.
ආපදාවට පත් වූ යාත්රාවේ සිටි විදේශීය කාර්යමණ්ඩල සාමාජිකයින් 02 දෙනෙකු සමඟ එම යාත්රාව නිරුපද්රිතව හම්බන්තොට වරායට රැගෙන ගොස් ගැටලුව නිරාකරණය කර ඇත.
වාර්තා වන පරිදි, මෙම යාත්රාව කාර්ය මණ්ඩල සාමාජිකයින් 02 දෙනෙකු සමග තායිලන්තයේ සිට බෙංගාල බොක්ක තරණය කරමින් සිට ඇත්තේ DNA විශ්ලේෂණ පර්යේෂණ කාර්යයක් සඳහා උසස් තත්ත්වයේ ක්ෂුද්ර ජීව විද්යාත්මක සාම්පල ලබා ගැනීම වෙනුවෙනි.
එහි පැඩලයක් භාවිතයෙන් යාත්රාව ධාවනය කිරීමේ යාන්ත්රික පද්ධතියේ දෝෂයක් වර්ධනය වී තිබේ.
යාත්රාව දකුණු වෙරළට ඔබ්බෙන් ශ්රී ලංකාවේ මුහුදු සීමාවෙහි දී අනතුරට ලක්ව ඇති අතර, එම යාත්රාව අලුත්වැඩියා කිරීම සඳහා ගොඩබිමට ගෙන ඒමට ශ්රී ලංකා නාවික හමුදාවෙන් සහාය ඉල්ලා දේශීය නියෝජිතයින් විසින් ඊයේ (02) ආපදා නිවේදනයක් නිකුත් කර තිබිණි.
ඒ අනුව දක්ෂිණ හමුදා විධානයට අයත් වේග ප්රහාරක යාත්රාවක් යොදවා පර්යේෂණ යාත්රාව හම්බන්තොට වරායට රැගෙන විත් අවශ්ය අලුත්වැඩියා කටයුතු සිදු කර තිබේ
